काठमाडौं। प्रधानमन्त्री केपी शर्मा ओलीले त्रिभुवन विश्वविद्यालय (त्रिवि)को जग्गा हिनामिना गर्ने जो कोहीलाई कानुनी कारबाहीको दायरामा ल्याउने प्रतिबद्धता जनाएका छन्।

मंगलबार बालुवाटारमा त्रिविको जग्गा खोजबिन गर्न गठित समितिले प्रतिवेदन बुझाएपछि प्रधानमन्त्री ओलीले त्यसबारे फेसबुकमा लेख्दै भने, “खोजबिन आयोगले प्रतिवेदनमा सिफारिस गरेका तथ्यहरूको थप अध्ययन गर्दै सरकारले यसलाई कार्यान्वयन गर्ने छ। त्रिविको सम्पत्ति विश्वविद्यालयकै नाममा फर्काइनेछ र हिनामिना गर्नेलाई कानुनी कारबाही गरिनेछ।”

सरकारले गत जेठ १८ गते पूर्वसचिव शारदाप्रसाद त्रितालको संयोजकत्वमा गठित समितिले मंगलबार प्रतिवेदन बुझाएको हो। त्रिताल अस्वस्थ भएपछि समिति सदस्य महेन्द्रकुमार थापाको संयोजकत्वमा काम सम्पन्न भएको थियो। समितिमा जानकीबल्लभ अधिकारी र प्रेम सागर चापागाईँ सदस्य थिए।

प्रतिवेदनले २०१३ सालदेखि हालसम्म काठमाडौं उपत्यकाभित्र कीर्तिपुर, नैकाप, ढुंगेअड्डा, पाटनलगायतका २१ क्याम्पसका जग्गाको अवस्था, दुरुपयोग, र त्यसको उचित उपयोगका लागि समाधानका उपायहरू सुझाएको छ। साथै, दुरुपयोग भएका जग्गाका सम्बन्धमा अख्तियार दुरुपयोग अनुसन्धान आयोग र केन्द्रीय अनुसन्धान ब्यूरोलाई कारबाहीको सिफारिस गरिएको छ।

प्रधानमन्त्रीले प्रतिवेदनमा सिफारिस भएका विषयलाई तत्काल कार्यान्वयन गर्ने र अध्ययन गर्न बाँकी रहेका क्षेत्रहरूबारे थप अनुसन्धान गरिने बताएका छन्। उनले भने, “यस कामलाई टुंगोमा पुर्‍याएरै छाडिनेछ।”

प्रधानमन्त्री ओलीले त्रितालकै संयोजकत्वमा २०७६ सालमा ललिता निवासको जग्गा खोजबिन गर्न गठित आयोगको स्मरण गर्दै त्रितालको शीघ्र स्वास्थ्य लाभको कामनासमेत गरेका छन्।

जग्गा हिनामिनाप्रधानमन्त्री केपी शर्मा ओलीप्रधानमन्त्रीको प्रतिबद्धता

प्रकाशित मिति: बुधबार, पुस ३, २०८१, ११:३३ बिहान

लेखक: समाचारपाटी