काठमाडाैँमा हिमालयको रहस्य र सिर्जनावृत्ति नामक चित्रकला प्रदर्शनी–२०८१ शुरु भएको छ । नेपाल ललितकला प्रज्ञा प्रतिष्ठानले काठमाडौंको नक्सालमा सो कला प्रदर्शन आयोजना गरेको हो । आईतवार काठमाडौंमा एक कार्यक्रमबीच सो कला प्रदर्शनीको उद्घाटन गर्दै प्रतिष्ठानका कुलपति नारदमणि हार्तम्छालीले पर्यावरणीय असरका कारण हिमालमा पर्दै गएको संकटबारे विश्व समुदायलाई जानकारी गराउन र कलाकारहरुको जिउने कलालाई उठान गर्नका लागि सो प्रदर्शनी आयोजना गरिएको बताउनु भयो । उहाँले सो चित्रकला प्रदर्शनीले नीति निर्माताहरुलाई पनि हिमालमा देखिएको संकट समाधानका लागि ठोस धारणा तय गर्न सहयोग पुग्ने विश्वास व्यक्त गर्नुभयो ।

कुलपति हार्तम्छालीले भन्नुभयो, ‘एउटा वस्तुगत आधारको हिमाल, अर्को भावार्थको हिमाल । र त्यसमा पर्यावरणीय सवालको उठानलाई हामीले विशेष चर्चा गर्न खोजिएको हो । त्यसकारण यो कलाकृतिलाई हामीले त्यही अर्थमा हेरिदिनुपर्ने हुन्छ होला । कलाकारहरुको कलालाई पनि स्थापित गराउन यो प्रदर्शन गरिएको छ । अर्का पर्यावरण र नीति निर्माण तहमा पनि हामीले हिमालको अवस्था यस्तो हुँदैछ । यो नेपालसँग मात्रै जोडिएको छैन । विश्व मानवीय पर्यावरणसँग पनि जोडिएको छ भन्ने कुराको मुल मक्सदलाई उठाउन पनि खोजिएको हुनाले यसै रुपमा बुझ्नुपर्दछ ।’

६ दिनसम्म चल्ने सो चित्रकला प्रदर्शनीमा हिमालको रहस्यसँग सम्बन्धित ६९ वटा र सिर्जनावृत्तिसँग सम्बन्धित १४ वटा चित्र कला समावेश गरिएको नेपाल ललितकला प्रज्ञा प्रतिष्ठानले जनाएको छ ।

—न्युज एजेन्सी नेपाल

चित्रकला प्रदर्शनी

प्रकाशित मिति: सोमवार, बैशाख ३, २०८१, ६:२५ बिहान

लेखक: समाचारपाटी