काठमाडौं I मधेशी आयोगले नेपाल प्रिमियर लिग (एनपीएल) क्रिकेटमा जनकपुर बोल्ट्सप्रति नश्लीय र साम्प्रदायिक व्यवहार गर्नेहरूमाथि कडा कारबाही गर्न सरकारलाई सिफारिश गरेको छ।

आयोगले एनपीएलको क्वालिफायर–२ अन्तर्गत जनकपुर बोल्ट्स र कर्णाली याक्सबीचको खेलमा उद्दण्ड समूहले अभद्र नारा र अपमानजनक व्यवहार गरेको भन्दै दोषीहरूमाथि तुरुन्त कानूनी कारबाहीको माग गरेको हो। आयोगले यस्ता घटनाले समाजमा विखण्डनको स्थिति सिर्जना गर्ने चेतावनी दिँदै सरकारले संवेदनशीलता देखाउन अपिल गरेको छ।

यसैबीच, सुदूरपश्चिम रोयल्सविरुद्धको खेलपछि पनि मधेशी समुदायका समर्थकहरूमाथि रंगभेदी व्यवहार भएको घटनाले जनमत पार्टीले गम्भीर ध्यानाकर्षण जनाएको छ। पार्टीले यस्ता आपत्तिजनक गतिविधिमा संलग्न व्यक्तिहरूको पहिचान गरी कारबाही गर्न गृह प्रशासनसँग माग गरेको छ।

नेपाली कांग्रेसका महामन्त्री गगन थापाले समेत जनकपुर बोल्ट्सका समर्थकप्रति नश्लीय र साम्प्रदायिक व्यवहार गर्नेहरूलाई तत्काल कारबाही गर्न सरकारसँग आग्रह गर्नुभएको छ। उहाँले यस्ता कार्य कुनै पनि बहानामा सह्य नहुने भन्दै दोषीलाई उन्मुक्ति दिन नहुने धारणा व्यक्त गर्नुभएको छ।

मधेशी आयोग, जनमत पार्टी, र विभिन्न राजनीतिक व्यक्तित्वहरूको आक्रामक प्रतिक्रियापछि सरकारले यस विषयमा तुरुन्त कदम चाल्ने अपेक्षा गरिएको छ।

प्रकाशित मिति: आइतवार, पुस ७, २०८१, ५:२६ बेलुका

लेखक: समाचारपाटी