चितवनको खैरहनी नगरपालिकाले शिक्षाको क्षेत्रमा नौलो अभ्यास शुरु गरेको छ । नगरपालिकाले विपन्न  परिवारका बालबालिकाको लागि बस्तीमै गृहकार्य कक्षा सञ्चालन गरेको हो । दैनिक ज्यालामजदुरी गरेर परिवार पाल्नुपर्ने, बालबच्चालाई पठनपाठनमा सहजीकरण गर्न नसक्ने परिवारका बालबालिकाको लागि उनीहरुलाई पायक पर्ने बस्तीमा गृहकार्य कक्षा सञ्चालन गरिएको हो । नगरपालिकाले सामुदायिक विद्यालयमा कक्षा १ देखि ५ सम्म अध्ययन गर्ने विद्यार्थीको लागि नगरभित्रको २८ स्थानमा गृहकार्य कक्षा सञ्चालन गरेको छ ।

गृहकार्य कक्षाको लागि बस्तीे नजिक रहेको कोठा,सामुदायिक भवन, संघसस्थाको भवन र विद्यालय नै भएको स्थानमा विद्यालयकै कोठामा गृहकार्य कक्षा सञ्चालन गरिएको खैरहनीका नगरप्रमुख शशीकुमार खनियाले जानकारी दिनुभयो । केही स्थानमा कोठा भाडामा लिएर समेत कक्षा सञ्चालन गरिएको र गृहकार्य कक्षाको लागि कापी समेत नगरपालिकाले उपलब्ध गराएको बताउनु भयो । विद्यालयमा अध्ययन गरेपछि घरमा सहजीकरण, सिकाउने व्यक्ति नहुदा विद्यार्थीले पर्याप्त शैक्षिक वातावरण नपाएको विषयलाई मध्यनजर गर्दै गृहकार्य कक्षा सञ्चालन गरिएको नगरप्रमुख खनियाले बताउनु भयो । 

विद्यालयमा दिइएको गृहकार्यसँगै अन्य थप विषयवस्तु र व्यवहारिक शिक्षा समेत गृहकार्य कक्षामा दिइँदै आएको छ । गृहकार्य कक्षाको सहायताले विपन्न परिवारका बालबालिकामा विद्यालयपश्चात पनि पढ्ने लेख्ने बानीको विकास हुने, अभिभावकको समय अभावमा समेत बालबालिकामाथी निगरानी र संरक्षण प्राप्त हुने खैरहनी नगरपालिककी उपप्रमुख कविता उप्रेतीले बताउनु भयो । गृहकार्य कक्षाको लागि वडा समितिले छनौट गरेका २८ जना सहजकर्ताहरुलाई खटाएको उहाँले बताउनु भयो । गृहकार्य कक्षाको लागि सहजकर्ताहरुमा बहालवाला शिक्षक, स्वयंसेवक शिक्षक र कक्षा १२ उत्तिर्ण गरेकाहरु रहेका छन् । प्रत्येक दिन दुईघण्टा कक्षा सञ्चालन हुँदै आएको छ । गृहकार्य कक्षा कार्यक्रममा नगरपालिकाको १३ वटै वडाका करिव ७ सय ८४ जना विद्यार्थी लाभान्वित हुने खैरहनीका नगर शिक्षा अधिकारी राजु बानियाँले जानकारी दिनुभयो । नगरपालिकाले यसअघि सामुदायिक विद्यालयहरुमा विषयगत अध्ययन गराउन ५८ जना स्वयंसेवक शिक्षकहरु खटाएर पठनपाठन गराउँदै आएको छ ।

—न्युज एजेन्सी नेपाल 

नौलो अभ्यास

प्रकाशित मिति: शनिबार, फाल्गुन २६, २०८०, ८:३६ बिहान

लेखक: समाचारपाटी