नेतुम्बो नन्दी–नदैतवाहले शुक्रवार नामिबियाको पहिलो महिला राष्ट्रपतिको रूपमा शपथ लिनुभएको छ । नामिबियाको स्वतन्त्रताको ३५ औं वार्षिकोत्सवको अवसरमा आयोजित एक समारोहमा नन्दी–नदैतवाहले २०२४ मा पूर्व राष्ट्रपति हेगे गिङोबको मृत्युपछि सत्ता सम्हालेका निवर्तमान राष्ट्रपति नाङ्गोलो म्बुम्बाको उत्तराधिकारीको रूपमा पदभार ग्रहण गर्नुभएको हो । १९९० मा स्वतन्त्र भएदेखि नामिबियाको पाँचौं राष्ट्रपतिको रूपमा नन्दी–नदैतवाहले २०२४ को राष्ट्रपति चुनावमा ५७ प्रतिशत मतका साथ जित हासिल गर्नुभएको थियो । नामिबिया गणतन्त्रको पाँचौं राष्ट्रपतिको रूपमा आफ्नो अगाडि रहेको कार्य भनेको देशको स्वतन्त्रताको उपलब्धिलाई सबै मोर्चामा संरक्षण गर्नु र जनताको आर्थिक र सामाजिक उन्नतिको अधूरो एजेण्डालाई सबैका लागि साझा सन्तुलित समृद्धि ल्याउन जोश र दृढताका साथ अगाडि बढाउनु रहेको बताउनु भयो । उद्घाटन समारोहमा धेरै अफ्रिकी देशका राष्ट्र प्रमुखहरूका साथै अन्तर्राष्ट्रिय तथा क्षेत्रीय संस्थाका नेताहरू उपस्थित थिए । ७२ वर्षीया नन्दी–नदैतवाह नामिबियाको सत्तारुढ दक्षिण पश्चिम अफ्रिका जन संगठन पार्टीकी सदस्य हुनुहुन्छ । जुन १९९० मा देशले स्वतन्त्रता प्राप्त गरेदेखि नै सत्तामा छ । उहाँ स्वतन्त्रताको संघर्षको नेतृत्व गरिरहेको बेला पार्टीमा सामेल हुनुभयो । 

नन्दी–नदैतवाह १९९० मा राष्ट्रिय सभामा प्रवेश गर्नुभयो । २००० मा महिला मामिला तथा बाल कल्याण मन्त्रालयको नेतृत्व गर्दै क्याबिनेट मन्त्री बन्नुभयो । पछि उहाँले सूचना तथा प्रसारण मन्त्री, वातावरण तथा पर्यटन मन्त्री र विदेश मामिला मन्त्रीको रूपमा काम गर्नुभयो । फेब्रुअरी २०२४ मा उहाँ नामिबियाको पहिलो महिला उपराष्ट्रपति बन्नुभएको थियो । 
सिन्ह्वा

नेतुम्बो नन्दी–नदैतवाहशपथ ग्रहण

प्रकाशित मिति: शनिबार, चैत्र ८, २०८१, १२:१५ बेलुका

लेखक: समाचारपाटी