कलाकारहरु नेपाली पत्रकारिताको विश्वसनियता कम हुँदै गएको बताएका छन् । 
शुक्रवार काठमाडौंमा आयोजित नेपाली चलचित्रमा मिडियाको प्रभाव अन्तरक्रिया कार्यक्रममा बोल्दै उनीहरुले यस्तो बताएका हुन् । उनीहरुले नेपाली सिने क्षेत्रमा कलम चलाउनेहरुले चलचित्र क्षेत्रका खोजमुलक समाचार लेख्न सक्नुपर्ने बताए । उनीहरुले चलचित्र क्षेत्रमा भएका विकृतिहरुका बारेमा पनि सिने पत्रकारहरुको कलम चलाउनुपर्ने बताए । उनीहरुले सानो गल्तीलाई पनि मलजल गरेर ठूलो बनाइदिने परिपाटीले आत्महत्यासम्मको बाटो राज्नुपरेको कतिपय कलाकारले उल्लेख गरे । कार्यक्रममा बोल्दै अभिनेत्री दीपाश्री निरौलाले मिडिया भन्ने बित्तिकै पछिल्लो समय आफूलाई बन्दुक तेर्साएको जस्तो हुने गरेको बताउनु भयो । उहाँले कतिपय सञ्चारमाध्यमहरुले सानो गल्तीलाई मलजल गरेर ठूलो बनाइदिँदा कलाकारहरु आत्महत्याको बाटो रोज्नुपर्ने स्थितिसम्म पुग्ने गरेको बताउनु भयो । 

उहाँले भन्नुभयो, ‘मिडिया भन्नेबित्तिकै पहिला त फ्रेण्ड्ली, रमाइलो लाग्थ्यो, अहिले त बन्दुक तेस्र्याए जस्तो लाग्छ । आजकाल म धेरै कम इन्टरभ्युमा जाने गर्छु, अहिलेको जमाना देखिहाल्नु भएको छ, सञ्जाल धेरै छ, मान्छे हो गल्ती त हुन्छ, तर त्यसलाई मलजल गरेर मर्न बाध्य गराइन्छ । ’

कार्यक्रममा बोल्दै अर्की अभिनेत्री केकी अधिकारीले पत्रकारिता क्षेत्रको सबैभन्दा ठूलो कुरा भनेकै विश्वसनियता भएपनि पछिल्लो समय विश्वसनियतामा कमी आउने गरेको बताउनु भयो । उहाँले श्रोत भनेर उल्लेख गरिएपनि कतिपय समाचार बिना श्रोत बनाइने गरेको बताउनु भयो । उहाँले चलचित्र सम्बन्धी समाचार बनाउँदा, अन्तर्वार्ता लिँदा पूर्व तयारी हुनुपर्ने बताउनु भयो । 
उहाँले भन्नुभयो, ‘पत्रकारिता क्षेत्रको सबैभन्दा ठूलो कुरा भनेकै विश्वसनियता हो । जति पाठक हुनुहुन्छ उहाँहरुले कतिको विश्वास गर्नुहुन्छ ? त्यो नै सम्पती हो । नेपाली चलचित्र क्षेत्रको पनि त्यही हो । चलचित्र सम्बन्धी समाचार बनाउँदा, अन्तर्वार्ता लिँदा पूर्व तयारी गर्नुपर्छ, त्यसले धेरै दुर्घटना हुन्छ, आफ्नै सूचनाको श्रोत नहुने छ, त्यसमा जोड दिनुपर्छ । कपि पेस्ट कल्चरलाई रोक्नुपर्छ ।’

कार्यक्रममा बोल्दै चलचित्र कलकार संघका अध्यक्ष मोहन निरौलाले  चलचित्रको समीक्षा गर्दा पूर्वाग्रही हुने गरेको बताउँदै यस्ता कुरामा यथार्थता पस्कनुपर्ने बताउनु भयो । उहाँले महिला कलाकार र पुरुष ककलाकारमाथि पनि हिंसाका घटनाहरु बढीरहेको बताउनु भयो । महिला कलाकारमाथिका अभद्र व्यवहार बाहिर आउन नसकेकाले यस्ता घटनामा उहाँहरुलाई सम्झाउन सके यस्ता घटनाहरु बाहिर आउने बताउनु भयो । 

कार्यक्रममा अन्य वक्ताहरुले चलचित्र क्षेत्र उकास्नका लागि कलाकारलाई र चलचित्र पत्रकारहरुलाई पनि आवश्यक प्रशिक्षण दिनुपर्ने बताए । उनीहरुले चलचित्र क्षेत्रलाई राज्यले महत्वपूर्ण क्षेत्र हो भनेर मान्न नसकेको गुनासो गरे ।  

नेपाली पत्रकारितामिडिया

प्रकाशित मिति: शनिबार, असार ३०, २०८०, ८:२१ बिहान

लेखक: समाचारपाटी