नेपाली काँग्रेसकी सचेतक सुशिला थिङले सरकार सांसदहरुले उठाएको प्रश्नको जवाफ नदिइकन जबरजस्ती अघि बढेकाले संसद अवरोध गर्नु परेको बताउनुभएको छ ।
शुक्रवार संसद भवन परिसरमा सञ्चारकर्मीहरुसँग कुरा गर्दै उहाँले यस्तो बताउनुभएको हो । उहाँले उपप्रधान एवं गृहमन्त्रीबिरुद्ध उजुरी परेको र छानबिन भइरहेको अवस्थामा प्रधानमन्त्रीसँग उहाँको नियुक्तिबारे जवाफ माग्दा सरकार पक्ष जबरजस्ती अघि बढेको बताउनु भयो । उहाँले संसद अवरोधलाई सरकारले जवाफदेहीता नदेखाउँदाको परिणामका रुपमा लिनुपर्ने बताउनु भयो । काँग्रेस लोकतान्त्रिक अभ्यासबाट नै अघि बढेको बताउनु भयो । भ्रष्टाचार र अनियमिततासम्बन्धी फाइलहरु सबै खोल्नुपर्ने र अपराधमा संलग्नहरुलाई कारबाही हुनुपर्ने बताउनु भयो ।
उहाँले भन्नुभयो, ‘विधेयकलाई अघि सारौँ भन्नेमा सरकार पक्ष जबरजस्ती लाग्नुभएको हो । यो विवादास्पद विषय छ, हामीले विगतको संसदमा पनि हेरेका छौँ । विगतमा पनि प्रश्न उठ्यो । त्यसमा अलिकति जवाफदेही तरिकाले सरकार नगएको हुनाले लोकतान्त्रिक अभ्यासबाट अघि बढेका हौँ । गैर लोकतान्त्रिक अभ्यासबाट गएका छैनौँ । फाइल कति वटा छ, तपाईहरुले सुन र पुनको पनि कुरा सुन्नुभयो होला नि । फाइल कति वटा ओपन गर्ने ? फाइल सबै यो देशमा ओपन गर्न सम्पूर्ण अहिलेका दल तयार छन् । २७५ जना माननीयहरु तयार हुनुहुन्छ ? काँग्रेस फाइल खोल्न तयार हुनुहुन्छ । मन्त्रीलाई बयान लिन अख्तियार कहाँ जान्थ्यो त्यो खोज्नुहोस् । फाइल सबैको खोलिनुपर्छ । अपराध र अन्याय गर्ने मान्छे उम्किनु हुँदैन ।’
उहाँले अनियमितताका सबै फाइल खोल्न सबै राजनीतिक दल तयार हो ? भन्दै प्रश्नसमेत गर्नुभयो ।
—न्युज एजेन्सी नेपाल