पोखरा । नेपाली काँग्रेसका योद्धा एवं प्रजातन्त्र सेनानी काँग्रेस बुढा दिल बहादुर गरुङको आज बिहान १०२ बर्षको उमेरमा निधन भएको छ । नेपाली काँग्रेसका केन्द्रिय सदस्य एवं संविधान सभा सदस्य अर्जुनप्रसाद जोशीले गरुङको पार्थिव शरीरमा आज पोखराको रामघाटस्थित बौद्ध अर्घौसदनमा पार्टीको झण्डा ओढाएर श्रद्धाञ्जली अर्पण गर्नुभएको थियो ।

श्राद्धञ्जली अपर्ण गर्दै काँग्रेस नेता जोशीले शताव्दी पुरुष स्व.गुरुङ नेपाली काँग्रेसको मात्र नभई सबै पार्टी र समुदायको साझा नेताका रुपमा रहनुभएको स्मरण गर्नुभयो । नेपाली काँग्रेस पार्टीका सभापति शेरबहादुर देउवाले नेपाली काँग्रेसको ज्येष्ठ राजनीतिज्ञ सभासदस्य समेत रहनुभएका स्व.गुरुङको निधन प्रति दुख व्यक्त गर्दै जारी गर्नुभएको शोक विज्ञप्ति नेता जोशीले पढेर सुनाउनुभएको थियो ।

पर्वत जिल्ला साविक आर्थरडाँडा घर भई हाल पोखरा महानगरपालिका शिवालयचोक बस्दै आउनुभएका स्व.गुरुङ नेपालको प्रजातान्त्रिक आन्दोलनका अगुवा नेता एवं काँग्रेस बुढाका नाममा प्रख्यात हुनुहुन्थ्यो । उहाँ तत्कालीन समयमा गाउँ पञ्चायतको संरचना सुरु भएपछि पाँच पटकसम्म वडा अध्यक्ष भएर काम गर्नुभयो भने तत्कालीन स्याङ्जा जिल्ला पञ्चायतको सदस्य समेत रहेर काम गर्नुभएको थियो ।

२०३२ सालपछि सो गाउँ पर्वत जिल्लामा समाहित भएको थियो भने अहिले कुश्मा नगरपालिका वडा नं १४ मा पर्दछ । स्व.गुरुङ नेपाली काँग्रेस पर्वत जिल्ला आर्थरडाँडाखर्कको संस्थापक एवं नेपाली काँग्रेस पर्वतको सदस्य भएर काम गर्नुभएको थियो ।

राजनीति रुपमा चेतना भएमात्र हरेक क्षेत्रको बिकास गर्न सकिन्छ र विभिन्न जातजातिको अधिकार स्थापित गर्न सकिन्छ भन्ने मान्यताका साथ राजनीतिमा लाग्नुभएका गुरुङ बौद्धिक एवं राजनीतिक विचारकका रुपमा चिनिनुभएको कुश्मा नगरपालिका वडा नं १४ का वडाअध्यक्ष रुद्रमोहन रिमालले बताउनुभयो ।

स्व.गुरुङले पञ्चकोशी मा.वि लगायत अन्य प्रा.वि विद्यालयको संस्थापक भएर गाउँमा शिक्षाको ज्योति फैलाउन योगदान पुर्याउनुभएको थियो । उहाँको एक श्रीमति, ३ छोरा, ३ बुहारी, ६ छोरी, ९ नाति, ११ नातिनी, ६ पनाती, र ३ पनातिनी हुनुहुन्छ ।जेठो छोरा सु.इन्द्र बहादुर गुरुङ, माईला छोरा यम बहादुर गुरुङ र कान्छा छोरा शेर बहादुर गुरुङ हुनुहुन्छ । कान्छा छोरा शेर बहादुरले एस.के साउण्ड एण्ड भिजनको नामबाट पोखरामा व्यवसाय गरिरहनुभएको छ ।

शताव्दी पुरुष स्व.गुरुङको शवयात्रामा पञ्चकोशी समाज, आर्थरडाँडाखर्क, विभिन्न तमु समाज, पोखरामा बसोबास गर्ने पर्वतबासी, काँग्रेस पर्वतका नेता, कास्की काँग्रेसका नेता तथा अन्य राजनीतिक पार्टीका नेता कार्यकर्ता, छिमेकी र आफन्तजनहरुको बाक्लो सहभागिता रहेको थियो ।

प्रकाशित मिति: मङ्लबार, मंसिर १८, २०८१, ६:४० बेलुका

लेखक: समाचारपाटी