नेपालमा लागुऔषध कारोबारमा महिलाहरु बढी प्रयोग हुने गरेको पाइएको छ । नेपाल प्रहरीको लागुऔषध नियन्त्रण ब्युरोले सो कारोबारमा महिलाहरु बढी प्रयोग हुने गरेको अनुसन्धानको क्रममा खुल्न आएको जनाएको हो । नेपाल बार एशोसिएशन, महिला समितिले बुधवार काठमाडौंमा आयोजना गरेको एक कार्यक्रममा बोल्दै ब्युरोका प्रमुख प्रहरी वरिष्ठ उपरीक्षक गोविन्द थपलियाले महिलाहरुले त्यस्तो काम गर्दैनन् भन्ने विश्वासको आधारमा पनि उनीहरुलाई सो कारोबारमा बढी प्रयोग गरेको पाइएको बताउनु भयो । उहाँले नेपालमा लागुऔषध प्रयोगकर्ताहरु बढ्नुमा आर्थिक समस्या नै मुल कारण भएको बताउनु भयो । साथीभाईको संगतले पनि त्यसमा नाबालक, नाबालिकाहरु यसमा संलग्न हुने गरेको ब्युरोको निष्कर्ष छ । 

ब्युरोका प्रमुख प्रहरी वरिष्ठ उपरीक्षक थपलियाले भन्नुभयो, ‘यो ड्रग्स कारोबारमा चाँही महिलाहरुलाई बढी प्रयोग गरेको देखिन्छ । किनभने महिलाहरु धेरै कुरामा के, कसो भने सोधीखोजी नगर्ने एउटा यो कुरा । अर्को, महिलाहरुले यस्तो काम गर्दैनन् भनेर मानिसहरुले विश्वास पनि गर्ने । त्यो भएको कारणले महिलाहरु यसमा बढी प्रयोग हुने गरेका छन् । २०७६ सालमा लागुपदार्थ प्रयोगकर्ताको संख्या १ लाख ३० हजार छ । यसमा महिलाको संख्या ८ हजार ७ सय छ । पुरुषको एक लाख २१ हजार छ । यसमा महिलाहरु बाहिर एक्सपोज कम हुन्छन् ।’

नेपालमा २०७६ सालको तथ्यांकअनुसार लागुऔषध प्रयोगकर्ताको संख्या १ लाख ३० हजार पुगेको छ । जसमा महिला संख्या ८ हजार ७ सय रहेको छ । महिलाहरु एक्सपोज हुन नचाहने भएकाले पनि उनीहरुको तथ्यांक कम देखिएको हुनसक्ने प्रहरीको बुझाई छ । 

नेपाल प्रहरीलागुऔषध

प्रकाशित मिति: बिहिबार, मंसिर २१, २०८०, ८:३७ बिहान

लेखक: समाचारपाटी