बीमा क्षेत्रमा समस्या बीमा कम्पनीकै कारणले आएका हुन्ः अध्यक्ष मदन दाहाल

नेपाल बीमा प्राधिकरणका अध्यक्ष मदन दाहालले बीमा क्षेत्रमा साक्षरताको अभाव रहेको बताउनुभएको छ । बिहीवार काठमाडौंमा आयोजित एक कार्यक्रममा बोल्दै अध्यक्ष दाहालले यस्तो बताउनुभएको हो । उहाँले बीमा क्षेत्रमा सबैभन्दा ठूलो चुनौतिका रुपमा बीमा साक्षरता रहेको देखिएको बताउनु भयो । उहाँले बीमा क्षेत्रले उद्योगी व्यवसायीदेखि आम नागरिकमा समेत बीमा साक्षरता जगाउन आवश्यक रहेको उल्लेख गर्नुभयो । उहाँले उद्योगी व्यवसायीहरुले बीमाले लागत बढाउने मात्रै काम गर्यो भन्ने गुनासो जायज नभएको भन्दै बीमाले उद्योगलाई सुरक्षित गरेको कुरा भुल्न नहुने बताउनु भयो । उहाँले बीमाले उद्योग व्यवसायको संरक्षण गरेको दाबी गर्नुभयो । उहाँले बीमाका विषयमा सबैलाई साक्षर बनाउन नसकेको कुरा बीमा क्षेत्रले स्वीकार गर्नुपर्ने बताउनु भयो । उहाँले बीमा क्षेत्रमा पछिल्लो समयमा देखिएका समस्या बीमा कम्पनीहरुकै कारण देखिएको उल्लेख गर्नुभयो । उहाँले बीमाको प्रिमियम र दाबी भुक्तानीको समस्या बीमा कम्पनीहरुकै कारण ठूलो भएको बताउनु भयो । उहाँले यी समस्या समाधान बीमा कम्पनीहरुले सुधार गरेर गर्नु आवश्यक रहेको बताउनु भयो । उहाँले बीमकले बीमा गरेको रकम दाबी भुक्तानी पाउन धेरै ढिला हुने गरेको गुनासो व्यापक रहेको भन्दै यसमा सुधार गर्न आवश्यक रहेको बताउनु भयो ।
उहाँले भन्नुभयो,‘बीमा क्षेत्रमा सबैभन्दा ठूलो चुनौति बीमा साक्षरता रहेको देखिएको छ । बीमाले लागत बढाउने मात्रै नभएर सुरक्षित गरेको कुरा भुल्न हुँदैन । कुनै संस्थाको नेतृत्वले बीमाले लागत बढ्यो भन्न मिल्दैन । बीमा उद्योग व्यवसायको संरक्षण गरेको छ । बीमाका विषयमा सबैलाई साक्षर बनाउन नसकेको कुरा बीमा क्षेत्रले स्वीकार गर्नुपर्छ । बीमा कम्पनीहरुकै कारण विभिन्न समस्या सिर्जना भएका छन् । बीमाको प्रिमियम बढी भयो,क्लेयम पाइएन भन्ने छ । जुन बीमा क्षेत्रमा दुई तीनवटा समस्या छन् । ती बीमा क्षेत्रले सिर्जना गरेका हुन् । बीमकले बीमा गरेको रकम दाबी भुक्तानी पाउन धेरै ढिला हुने गरेको छ । यसमा सुधार गर्न आवश्यक छ । जीवन बीमा सरेण्डर असाध्यै बढेको छ । त्यसको जिम्मेवार को हो । बीमित,विमक,बीमा प्राधिकरण हो ? यसलाई कसरी निराकरण गर्ने हो । यो ठूलो समस्याको रुपमा छ । यो विषयमा पनि निराकरण गर्नु आवश्यक छ । यो समस्या समाधान गर्न बीमा प्राधिकरणले के गर्नुपर्छ गर्न तयार छ ।’