नेपाल क्रिकेट संघ (क्यान) को आयोजना पहिलो पटक हुन लागेको नेपाल टी–२० लिग क्रिकेटको एउटा फ्रेन्चाइज टिम काठमाडौं गोर्खाजले प्रतियोगिताबाट नाम फिर्ता लिएको छ ।

लिग घोषणा हुँदादेखि नै आलोचना हुँदै आएको र विवादित बनेको नेपाल टी–२० मा पछिल्लो पटक फ्रेन्चाइजले नै हात झिकेपछि समस्यामा देखिएको छ ।

क्यानले आफ्नै आधिकारिक फ्रेन्चाइज गर्ने भन्दै गत जेठमा नेपाल टी–२० लिग घोषणा गरेको थियो । आगामी डिसेम्बर ११ देखि ३१ सम्म (मंसिर २५ देखि पुस १६ गते) सम्म पहिलो संस्करण आयोजना गर्ने तयारी भइरहेको थियो । तर लिग हुनु दुई हप्ता भन्दा कम समय बाँकी रहँदा कान्तिपुर मिडियाको स्वामित्वमा रहेको काठमाण्डौं गोर्खाजले नाम फिर्ता लिएको छ ।

क्यानका कार्यवाहक सचिव प्रशान्त विक्रम मल्लले काठमाण्डौंले नाम फिर्ता लिएको पुष्टि गर्नुभयाे । ‘काठमाण्डौं गोर्खाजले नाम फिर्ता लिएको छ । अब त्यसको ठाउँमा नयाँ टिम समावेश गर्नुपर्ने हुन्छ,’ मल्लले भन्नुभयाे ।

लिग नजिकै आएको अवस्थामा एउटा टिमले नाम फिर्ता लिँदा अब के हुन्छ र यसले कस्तो असर पर्छ भन्ने प्रश्न उठेको छ । यसमा मल्ल भन्नुभयाे, ‘अब काठमाण्डौंसँग सम्झौतामा रहेका खेलाडीहरुलाई अर्को टिममा अनुबन्ध गराउनुपर्छ । आईसीसीबाट मान्यता लिइसकेकाले जसरी पनि यो लिग गर्नुपर्छ । यसले अब लिग एक साता जति पछि सर्न सक्छ ।’

यसअघि असोजमा गर्ने भनिए पनि निर्वाचनको अघि सुरक्षाको कारण देखाउँदै नेपाल टी-२० लिग सारिएको थियो ।

काठमाण्डौंसँगै लिगमा ६ टिमले प्रतिस्पर्धा गर्ने तय छ । क्यानले लिगका लागि नेपाली र विदेशी खेलाडीको ड्राफ्ट पनि गरिसकेको छ ।

काठमाण्डौंको मार्की खेलाडीमा राष्ट्रिय टिमका पूर्व कप्तान ज्ञानेन्द्र मल्ल हुनुहुन्थ्याे । यस्तै काठमाण्डौं टिममा कमल सिंह ऐरी, अभिनाश बोहरा, बसिर अहमद जस्ता खेलाडी छन् । श्रीलंकन थिसारा परेरा, कामिन्दु मेन्डिस, धनन्जय डा शिल्भा पनि काठमाण्डौंमा अनुबन्ध थिए ।

source:-onlinekhabar

नेपाल क्रिकेट संघ

प्रकाशित मिति: बुधबार, मंसिर १४, २०७९, २:३६ बेलुका

लेखक: समाचारपाटी