काठमाडौं । नेपाल क्रिकेट संघ क्यानको महिला टिमको केन्द्रीय सम्झौता (सेन्ट्रल कन्ट्रयाक्ट)मा खेलाडी कटौती गर्ने निर्णय आलोचित बनेको छ । बुधबार सम्पन्न क्यानको बैठकले महिला टिममा १२ जना खेलाडीलाई मात्र सेन्ट्रल कन्ट्रयाक्टमा राख्ने निर्णय गरेको थियो ।

महिला खेलाडीका लागि बजेट नभएको तर्क गर्ने क्यानले क्रिकेट सेन्ट्रल कन्ट्रयाक्टमा ६ खेलाडी कटौती गरी महिला क्रिकेट आफ्नो प्राथमिकतामा नपरेको सन्देश दिन खोजेको छ । सेन्ट्रल कन्ट्रयाक्टमा नपरेका खेलाडी भने क्यानले आफूहरुको भविष्य अन्योलमा पारेको भन्दै दुखेसो गर्छन् ।

राष्ट्रिय टिमका प्रमुख छनोटकर्ता दीपेन्द्र चौधरी महिला क्रिकेटबाट नतिजा निस्कन नसकेका कारण सेन्ट्रल कन्ट्र्याकमा रहने खेलाडीको संख्यामा कटौती गरिएको तर्क गर्छन् ।

सेन्ट्रल कन्ट्र्याक्ट सहज विषय नभएको भन्दै उहाँले थप्नुभयाे, ‘महिलाको प्रतियोगिता कम छ, नतिजा निस्किएको छैन । ‘महिलाहरुका लागि छुट्टै बजेट आउँदैन । केटाहरुका लागि आएको रकम छुट्याउने गरिएको छ,’ चौधरीले भन्नुभयाे ।

अन्तर्राष्ट्रिय क्रिकेटमा राम्रो प्रदर्शनका लागि खेलाडीलाई प्रोत्साहित गर्नुपर्ने आफ्नो जिम्मेवारी बिर्सेर क्यान खेलाडीको सुविधा कटौतीमा लागि परेको छ । पुरुषकै समान नतिजाको अपेक्षा गर्ने क्यानले महिला क्रिकेटमा गरेको लगानी तुलना नै गर्न मिल्दैन ।

‘हामीले पुरुष टिमकै सुविधा खोजेका होइनौं । तर, एउटा टिम पुग्ने गरी खेलाडी राख्नुपर्ने थियो,’ दशकदेखि राष्ट्रिय टिमबाट खेल्दै आएकी ब्याटर सरीता मगरले भन्नुभयाे ।

एपीएफकी सरीता यसपल्ट सेन्ट्रल कन्ट्र्याक्टबाट बाहिरिनुभएकाे छ । ‘२ वर्षदेखि मेरो प्रदर्शन राम्रो छैन । म करारमा परिनँ भनेर गुनासो पनि छैन । तर, प्रदर्शनका खेलाडीहरु पनि छुटेका छन्,’ उहाँले प्रतिप्रश्न गर्नुभयाे, ‘१४ वर्ष राष्ट्रिय टिममा खेलेर मैले के पाएँ त ? भविष्य नै नभएको करिअर भयो नेपालमा महिला क्रिकेटरको ।’

क्रिकेटमा भविष्य बनाउने लक्ष्यका साथ करिअरको सुरुवातमा रहेकाहरुलाई यस्तो व्यवहारले निरुत्साहित गर्ने उहाँको तर्क छ । सरीताको भनाइलाई पुष्टि गर्ने गरी एक युवा खेलाडीले क्यानको पछिल्लो ग्रेडिङबाट आफ दुरुत्साहित भएको बताउनुभयाे ।

‘हामीलाई एक प्रकारले दुरुत्साहन भएको छ । महिला राष्ट्रिय टिममा पर्छु भनेर खेल्ने हामीलाई करार संख्या घट्नु भनेको के देखेर क्रिकेट खेल्नु र कसरी भविष्य देख्नु,’ नाम नखुलाउने सर्तमा यू–१९ राष्ट्रिय टिमकी ती खेलाडीले भन्नुभयाे ।

खेल खेलेर केही गरौंला भन्ने आशा मर्दै गएको उहाँको भनाइ छ । भन्नुहुन्छ, ‘प्राक्टिस पनि जान छाडिसकें ।’

महिला क्रिकेट खेलाडी

प्रकाशित मिति: शनिबार, माघ २१, २०७९, ११:१३ बिहान

लेखक: समाचारपाटी