काठमाडौं I नेपाल र चीनबीचको आर्थिक साझेदारीलाई प्रगाढ बनाउँदै नेपाल-चीन व्यापार समिट सम्पन्न भएको छ। बेइजिङमा आयोजित यस कार्यक्रमले दुवै देशबीच व्यापार, पर्यटन, र लगानी विस्तारमा महत्त्वपूर्ण योगदान पुर्‍याउने अपेक्षा गरिएको छ।

प्रधानमन्त्री केपी शर्मा ओलीले नेपालको लगानी वातावरणमा सुधार हुँदै गएको बताउँदै विदेशी लगानीकर्तालाई जलविद्युत, पर्यटन, र उत्पादन क्षेत्रमा अवसरहरूको फाइदा उठाउन आग्रह गर्नुभयो। निजी क्षेत्रलाई अर्थतन्त्रको मेरुदण्ड भन्दै सरकार लगानी संरक्षण र सहजीकरणमा प्रतिबद्ध रहेको उहाँले बताउनुभयो।

चीनका वाणिज्य उपमन्त्री लिंग जिएले नेपाल-चीन सम्बन्धलाई ऐतिहासिक र आर्थिक दृष्टिले महत्त्वपूर्ण भएको उल्लेख गर्नुभयो। उहाँले नेपालमा चिनियाँ लगानीलाई थप प्रवर्द्धन गर्दै पारवाहन सहजीकरण र भन्साररहित व्यापार सुविधाबाट नेपाल लाभान्वित हुने बताउनुभयो।

महासंघका अध्यक्ष चन्द्रप्रसाद ढकालले नेपालमा लगानी वातावरण सुधारका लागि सरकारले ८ कानुन संशोधन गरेको र द्विपक्षीय लगानी सम्झौताको खाका तयार भएको जानकारी गराउनुभयो। उहाँले चीनसँग सिधा उडान र सीमा क्षेत्रको पूर्वाधार विकासमा पहल गर्न जोड दिनुभयो।

समिटमा १२० चिनियाँ व्यवसायी र ५० नेपाली उद्यमी सहभागी थिए। नेपाल उद्योग वाणिज्य महासंघ, चीन काउन्सिल फर प्रमोशन अफ इन्टरनेसनल ट्रेड (CCPIT), र चीनस्थित नेपाली दूतावासले संयुक्त रूपमा आयोजना गरेको यो समिटले आर्थिक साझेदारीमा नयाँ आयाम थप्ने विश्वास लिइएको छ।

प्रकाशित मिति: बुधबार, मंसिर १९, २०८१, ७:२९ बेलुका

लेखक: समाचारपाटी