काठमाडौं । नेपाल वायुसेवा निगमले मुलुकको पर्यटन प्रवर्द्धन बलिया उपस्थिति जनाउने उद्देश्यले दुई वटा न्यारोबडीे जहाज भाडामा लिन लागेको बताएको छ ।

मंगलबार निगमले दुईवटा न्यारोबडी जहाज भाडामा लिनको लागि सार्वजनिक खरिद ऐन, नियम बमोजिम सार्वजनिक माध्यमबाट अन्तर्राष्ट्रिय बोलपत्र आह्वान गरेको हो ।

निगमका प्रवक्ता रमेश पौडेलले जहाज भाडामा दिने कम्पनीले विमान, चालक दल, मर्मतसम्भार, बीमा समेत आफैले व्यहोर्ने र नेपाल वायुसेवा निगमले बजार व्यवस्थापन गर्ने सम्झौतामा दुई वटा न्यारोबडी जहाज भाडामा लिन लागिएको बताउनुभयो । उहाँले निगमको कार्ययोजना अनुरुप हाल निगमसँग भएको दुईवटा वाइडबडी जहाज जापान, सिड्नी र कोरिया उडानमा प्रयोगहुँदा अन्य क्षेत्रमा हाल भएका दुइवटा न्यारोबडी जहाजले उडान चापको माग धान्न नसक्ने भएकोले दुई वटा जहाज थप गर्न लागेको उल्लेख गर्नुभयो ।

उहाँले थप भएका दुई जहाजले अहिले रहेको उडान चापलाई व्यवस्थापन गर्नेगरी दिल्ली, दुबई, दोहा, मलेसिया लगाएतका क्षेत्रमा उडान थप गरी आय बढाउने योजना रहेको बताउनुभयो ।

प्रवक्ता पौडेलले राष्ट्रिय ध्वाजवाहक जहाज भन्ने तर ४ वटा जहाज राखेर ४ सय जहाज भएको मुलुकसँग प्रतिस्पर्धा गर्न नसक्ने अवस्था रहेको भन्दै अन्य देशसँग प्रतिष्पर्धाको लागि जहाज आवश्यक परेको बताउनुभयो ।

उहाँले विमान, चालक दल, मर्मतसम्भार, बीमा समेत भाडामा जहाज दिने कम्पनीको हुने र बजार व्यवस्थापन नेपाल वायुसेवा निगमको जिम्मा रहने बताउनुभयो । उहाँले निगमले साधन स्रोत ल्याएर सम्भाव्य बजारलाई बढाएर आम्दानी गर्ने, निगमको आम्दानी पनि बढाउने र जहाजको भाडा पनि तिर्नेगरी योजना अगाडि बढेको बताउनुभयो ।

न्युज एजेन्सी नेपाल

न्यारोबडीे जहाजपर्यटन प्रवर्द्धन

प्रकाशित मिति: बुधबार, माघ २४, २०८०, १:४० बेलुका

लेखक: समाचारपाटी