काठमाडौं । नेकपा एमालेको भ्रातृ संगठन राष्ट्रिय युवा संघ नेपालले मूल्यवृद्धिको विरोधमा आज प्रदर्शन गर्ने भएको छ। युवा संघ नेपालले आज साँझ ६ बजे देशभर एकैपटक जुलुस गरी मूल्यवृद्धिको विरोध गर्न लागेको युवासंघका केन्द्रीय अध्यक्ष क्षितिज थेबेले जानकारी दिनुभयाे। दैनिक रुपमा मूल्यवृद्धि भएको भन्दै अब युवा संघ चुप लागेर नबस्ने उहाँले बताउनुभयाे।

पेट्रोलियम पदार्थ र अन्य दैनिक उपभोग्य सामानको चर्को मूल्यवृद्धिवरुद्ध प्रमुख प्रतिपक्षी नेकपा एमालेनिकट राष्ट्रिय युवा संघ नेपालले प्रदर्शन गर्न लागेको हो। काठमाडौं जिल्लामा पनि साँझ ६ बजे नयाँ बानेश्वरमा प्रदर्शन गरिने युवा संघका नेता निरोज पौड्यालले जानकारी दिए। जनतालाई समस्या पर्ने गरि मूल्यवृद्धि गर्दा पनि सरकारमा रहेका मौन रहेकाले विरोधमा उत्रनुपरेको उनको भनाई छ।

बिहीबार मात्रै पेट्रोलियम पदार्थको मूल्य वृद्धि भएको छ। नेपाल आयल निगमको सञ्चालक समिति बैठकले ग्यासको मूल्य पनि २३५ रुपैयाँ, पेट्रोलमा प्रतिलिटर ४ र डिजेलमा ३ रुपैयाँले वृद्धि गरेको छ।

अहिले हरेक भान्छामा महँगी बढ्दा सर्वसाधारणलाई दैनिक गुजारा चलाउन हम्मे परेको छ। बजारमा उपलब्ध हुने करिब ४० खाद्यवस्तुको मूल्यवृद्धि एक वर्षको अन्तरमा न्यूनतम ३ प्रतिशतदेखि १५० प्रतिशतले बढेको छ।

खाद्यान्न, लत्ताकपडा, तरकारीजस्ता अत्यावश्यक वस्तुदेखि शिक्षा शुल्क, स्वास्थ्य सेवा शुल्कलगायतमा चर्को महँगीले आम सर्वसाधारण मारमा छन्। अझ धमाधम चाडपर्व नजिकिँदै छ। प्रायः तीज, दसैं, तिहार, छठजस्ता पर्वमा बढी खपत हुन्छ। यस्ता चाडपर्वको मौकामा व्यवसायीहरूले थप महँगो बनाउने गरेका छन्।

annapurnapost

मूल्यवृद्धिराष्ट्रिय युवा संघ

प्रकाशित मिति: शनिबार, भदौ १६, २०८०, १२:३५ बेलुका

लेखक: समाचारपाटी