विभागीय टोलीहरू त्रिभूवन आर्मी, नेपाल पुलिस र एपिएफसँगै सुदूरपश्चिम प्रदेश राष्ट्रिय महिला कबड्डी प्रतियोगिताको २० औं संस्करणमा सेमिफाइनलमा प्रतिष्पर्धा गर्ने भएका छन् । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा भएको प्रतियोगितामा समूह ‘ए’ बाट आर्मी र पुलिस तथा समूह ‘बी’ बाट एपिएफ र सुदूरपश्चिमले सेमिफाइनल यात्रा पक्का गरेका हुन् । अब सेमिफाइनलमा आर्मीले सुदूरपश्चिम प्रदेशसँग र पुलिसले एपिएफसँग प्रतिष्पर्धा गर्नेछन् । चार टोली रहेको समूह ‘ए’ मा आर्मी र पुलिसले समान तीन जित निकाले । पुलिसले चार खेलमध्ये आर्मीसँग नै हार बेहोरेको थियो । शनिवार भएका खेलमा आर्मीले पहिलो खेलमा कोसी प्रदेशलाई ७३–१३ र दोस्रो खेलमा कर्णाली प्रदेशलाई ५२–१२ अंकले हरायो ।

पहिलो खेलमा आर्मीका गंगा घिमिरे र दोस्रो खेलमा नानुमाया पराजुली प्लेअर अफ दी म्याच भए । पुलिसले भने पहिलो खेलमा कर्णाली प्रदेशलाई ३६–२२ र दोस्रो खेलमा गण्डकीलाई ३६–१६ अंकले हरायो । यी दुवै खेलमा पुलिसकी मानमती बिष्ट प्लेअर अफ दी म्याच घोषित भइन् । पुलिसले शुक्रवार कोशीमाथि पनि जित निकालेको थियो । त्यो खेलमा पनि मानमति नै उत्कृष्ट भएकी थिइन् । यस समूहमा पहिलो दिन कर्णालीले दुई जित निकाल्दै सुखद् शुरुवात गरेको थियो । तर शनिवार दुई खेल गुमाएपछि सेमिफाइनल सम्भावना सकिएको हो । 

चार टोली रहेको समूह ‘बी’ बाट एपिएफले पनि तीन जित निकालेको छ । एपिएफले पहिलो खेलमा वागमती प्रदेशलाई ३६–१६ र दोस्रो खेलमा लुम्बिनी प्रदेशलाई ४३–१५ अंकले हरायो । एपिएफको पहिलो जितमा रबिना चौधरी र दोस्रो जितमा आसिका कुँवरले उत्कृष्ट प्रदर्शन गरे । उनीहरू प्लेअर अफ दी म्याच पनि भए । एपिएफले पहिलो दिन सुदूरपश्चिम प्रदेशलाई हराएको थियो । यसै समूहबाट शनिवार सुदूरपश्चिमले पहिलो खेलमा लुम्बिनीलाई ४३–३८ र दोस्रो खेलमा मधेस प्रदेशलाई २४–१२ अंकले हराउँदै तेस्रो जित जित निकालेको हो । 

शनिवार सुदूरपश्चिमको दुई जितमा श्रृजना धानुक र मनीषा जोशी प्लेअर अफ दी म्याच भए । शुक्रवार सुदूरपश्चिमले बागमतीलाई हराउँदा एपिएफसँग भने नतिजा सुम्पिएको थियो । अब आईतवार लिग चरणका दुई खेलसँगै सेमिफाइनल र उपाधि छिनोफानो पनि हुने अखिल नेपाल कबड्डी संघका महासचिव अरविन्द झाले जानकारी दिए । शनिवार नै भएको अन्य खेलमा वागमतीले मधेस प्रदेशलाई ४१–१५ र गण्डकीले कोशीलाई ३७–३३ अंकले हराए । समूह ‘ए’ मा नेपाल आर्मी, नेपाल पुलिस, कोशी, कर्णाली र गण्डकी प्रदेश छन् ।

अर्को समूह ‘बी’ मा एपिएफ, सुदूरपश्चिम, वागमती, लुम्बिनी र मधेश प्रदेश छन् । प्रतियोगिताको विजेताले दुई लाख, उपविजेताले एक लाख तथा सेमिफाइनलमा पराजित हुने दुई टोलीले समान ५० हजार रुपैयाँ पाउने अखिल नेपाल कबड्डी संघले जनाएको छ । उत्कृष्ट रेडर र डिफेन्डरले ४० इन्चको टिभी पाउनेछन् । यस प्रतियोगिताबाट जुनमा हुने विश्वकपका लागि खेलाडी छनोट गरिने भएको छ ।

—न्युज एजेन्सी नेपाल

राष्ट्रिय महिला कबड्डीसेमिफाइनल

प्रकाशित मिति: शनिबार, चैत्र १, २०८१, ९:११ बेलुका

लेखक: समाचारपाटी