काठमाडौं । राष्ट्रिय स्वतन्त्र पार्टीका सभापति रवि लामिछानेले आफूहरूसँग बेच्नका लागि मदन वीपी कोही नभएको बताउनुभएकाे छ। ठूला भनिएका दलहरूले मदन-वीपीको नाम बेच्ने गरेको बताउँदै उनले आफूहरूसँग सुशासनको एजेण्डामात्र भएको बताउनुभयाे। 'बेच्नका लागि हामीसँग मदन-वीपी कोही छैनन्। हामीसँग गरेर देखाउन सुशानको एजेण्डा छ। हृदय र क्षमतावान् व्यक्तित्वहरू हुनुहुन्छ। हामी त्यसकै आधारमा अगाडि बढेका हौं,' उहाँले भन्नुभयाे। सभापति लामिछानेले नेताहरूले नातपात र साला-भतिजालाई भागबण्डा गरेर देश डुबाएको आरोप लगाउनुभयाे। उहाँले राष्ट्रिय स्वतन्त्र पार्टीले पदको बाँडफाँड नगर्ने स्पष्ट पार्नुभयाे।

'पदको बाँडफाँड गरेर देश कहिल्यै बन्दैन। भागबण्ड गरेरै देशको अवस्था यस्तो भएको हो। एकपटक लुटलाई बन्द गर्ने अवसर दिनुहोस्। मात्र एकपटक अवसर दिनुभयो भने साला भतिजालाई भागबण्डा गर्नेहरूको खेल रोकेर देखाउँछौं,'उहाँले भन्नुभयाे। विश्वविद्यालयमा तालाबन्दी गरेर देशको भविष्य नबन्ने बताउँदै त्यहाँको ताला खोल्नुपर्ने आवश्यक रहेको बताउनुभयाे। उहाँले आगामी निर्वाचनमा जनताले चुनेरै पठाएका व्यक्तिलाई उम्मेदवार बनाउने घोषणा गरे। उहाँले रास्वपाको उम्मेदवार प्राइमरी निर्वाचनबाट चुनिएर आउने स्पष्ट पार्नुभयाे। 'आगामी निर्वाचनमा हामीले टीका लगाएर उम्मेदवार बनाउने छैनौं। प्राइमरी इलेक्सन गराएर उम्मेदवार उठाउनेछौं।

पैसाको बिटो र रक्सीका बोतल बोकेर चुनाव लड्नेको विरोधी हौं हामी,' उहाँले भन्नुभयाे, 'आउने निर्वाचनसम्म एक से एक मान्छेहरू तयार हुनेछन्। ती मान्छेहरूलाई छान्ने जिम्मा पनि तपाईँहरूकै हुनेछ।' उहाँले रास्वपाले आफ्नै एजेण्डा र मुद्दा बोकेर अगाडि बढ्ने बताउनुभयाे। त्यसका लागि कुनै दलसँग पनि गठबन्धन नगर्ने उद्घोष गर्नुभयाे। 'हामी कुनै पनि निर्वाचनमा गठबन्धन र ठगबन्धन गर्दैनौं। नेताहरुले गठबन्धन नगर्ने बताए पनि राष्ट्रिसभामा फेरि गठबन्धनकै चर्चा गरिरहेका छन्,' उहाँले भन्नुभयाे। उहाँले रास्वपासँग देश हाँक्नसक्ने होनहार व्यक्तिहरु रहेको भन्दै बिगार्नेलाई तुरुन्तै कारबाही गर्ने गरेको बताउनुभएकाे थियाे।

राष्ट्रिय स्वतन्त्र पार्टीसभापति रवि लामिछाने

प्रकाशित मिति: शनिबार, मंसिर ३०, २०८०, ५:०८ बेलुका

लेखक: समाचारपाटी