काठमाडौं । कक्षा १२ को परीक्षा ११ वैशाखदेखि सञ्चालन हुँदैछ । तर, शिक्षकहरूले परीक्षाको व्यवस्थापन र सञ्चालनमा सहभागी नहुने घोषणा गरेका छन् । परीक्षा सञ्चालन गर्ने शिक्षकले नै सहभागी नहुने बताएपछि अन्योल भएको छ ।

राष्ट्रिय परीक्षा बोर्ड अध्यक्ष महाश्रम शर्मा यहि गतिमा शिक्षकहरूको आन्दोलन जारी रहेमा परीक्षा प्रभावित हुने बताउँनुहुन्छ । ‘आन्दोलन रोकिएन भने प्रभावित हुन्छ । परीक्षाको व्यवस्थापन गर्ने नै शिक्षक हो । तर, सरकार र शिक्षकको संवाद निष्कर्षमा पुग्छ भन्ने विश्वास छ’, उहाँले भन्नुभयाे ।

बोर्डले परीक्षाको तयारी पूरा गरेको उहाँले बताउनुभयाे । ‘बोर्डले तयारी गरेको छ । व्यवस्थापन गर्न पनि भनेका छौं । विद्यार्थीको भविष्य भनेको हामी सबैको भविष्य हो । कक्षा १२ उच्च शिक्षामा जाने परीक्षा हो । अन्तर्राष्ट्रिय विषय पनि हो । एक दिन अफ्ट्यारो भयाे भने पनि असर पर्छ’, उहाँले भन्नुभयाे, ‘बोर्डले अनुरोध गरेको छ । सरकार र शिक्षकबीचको संवाद टुंगिन पर्‍यो ।’

शिक्षकले परीक्षा नरोक्ने उहाँले विश्वास व्यक्त गर्नुभयाे । ‘आफैंले पढाएको विद्यार्थीको परीक्षा रोक्छौं भन्नु राम्रो होइन । शिक्षकले रोक्नु हुन्छ भन्ने विश्वास छैन’, उहाँले भन्नुभयाे ।

बोर्डका सदस्य सचिव जंगबहादुर अर्यालका अनुसार परीक्षा दिने करिब ५ लाख विद्यार्थी छन् । उहाँले पनि परीक्षा नरोकिने बताउनुभयाे । ‘क्यालेन्डर बनाएर काम गरेका छौं । यो मितिमा परीक्षा हुने एक वर्षअघि नै थाहा थियो । परीक्षा प्रभावित हुँदैन भन्ने विश्वास छ’, उहाँले भन्नुभयाे ।

onlinekhabar

परीक्षाराष्ट्रिय परीक्षा बोर्ड

प्रकाशित मिति: बुधबार, बैशाख ३, २०८२, ११:१५ बिहान

लेखक: समाचारपाटी