'यो देश नबन्नुमा मुख्य कारण यो देशको अहिलेको नेतृत्व हो':-राजेन्द्र लिङदेन

राष्ट्रिय प्रजातन्त्र पार्टीका अध्यक्ष राजेन्द्र लिङदेनले नेकपा (माओवादी केन्द्र) का अध्यक्ष पुष्पकमल दाहाल, नेकपा (एकीकृत समाजवादी) का अध्यक्ष माधवकुमार नेपालसँग भेट गर्नुभएको छ ।

शुक्रवार सिंहदरबारमा तीन राजनीतिक दलका नेताहरुबीच भेट भएको हो । भेटमा राप्रपाले पृथ्वी जयन्तीको अवसरमा जलपान समारोह आयोजना गर्ने सोही विषयमा निमन्त्रणा गर्न आएको राप्रपा अध्यक्ष लिङदेनले बताउनु भयो । उहाँले भेटमा समसामयिक राजनीतिक विषयमा पनि केही छलफल भएको बताउनु भयो । देश बनाउनका लागि संविधान परिवर्तन जरुरी रहेको बताउनु भयो ।

उहाँले भन्नुभयो, ‘राष्ट्रिय प्रजातन्त्र पार्टीले निरन्तर रुपमा भन्दै आएको छ की यो देश पनि बनाउन सकिन्छ । यो देश नबन्नुपर्ने कुनै कारण छैन । यो देश नबन्नुमा मुख्य कारण यो देशको अहिलेको नेतृत्व हो । र अहिलेको नेतृत्वले ल्याएको व्यवस्था हो । त्यसका लागि संविधान परिवर्तन जरुरी छ ।’

अध्यक्ष लिङदेनले दुई राजनीतिक दलले संविधान परिवर्तनको एजेण्डा लिएर सरकार बनाएको भएपनि पूरा नगरेको बताउनु भयो । अहिलेको नेतृत्व र व्यवस्था परिवर्तन जरुरी रहेको बताउनु भयो ।

—न्युज एजेन्सी नेपाल

राष्ट्रिय प्रजातन्त्र पार्टी