नेकपा (एकीकृत समाजवादी)ले आफ्नो राष्ट्रिय महाधिवेशन आगामी २०८१ साल जेठमा मात्रै गर्ने भएको छ । मंगलवार काठमाडौंमा बसेको पार्टी केन्द्रिय सचिवालय बैठकले माघको १४ र १५ गतेका लागि तय गरेको पार्टीको राष्ट्रिय महाधिवेशन २०८१ साल जेठ ३ देखि ७ गतेसम्म गर्ने निर्णय गरेको हो । पार्टीको महाधिवेशन जेठको पहिलो साता काठमाडौंमा हुनेगरी मिति सारिएको पार्टीका उपमहासचिव डा.गंगालाल तुलाधरले जानकारी दिनुभयो ।

त्यसैगरी बैठकले पार्टीको महाधिवेशनमा प्रश्तुत हुने प्रतिवेदनहरुको मस्यौदा तयार पार्नका लागि अध्यक्ष माधवकुमार नेपालको नेतृत्वको २७ सदस्यीय मस्यौदा कमिटी पनि बनाएको छ । पार्टीका पदाधिकारीसहितका नेताहरुलाई सो मस्यौदा कमिटीमा राखिएको पनि तुलाधरले बताउनु भयो । नेकपा एसले माघ १४ र १५ गते भने पार्टीको राष्ट्रिय सम्मेलन गर्ने भएको छ । बैठकले सो सम्मेलनका लागि विधानको व्यवस्था गर्न पार्टीका उपाध्यक्ष एवं संगठन विभाग प्रमुख वेदुराम भुसालको नेतृत्वमा महासचिव घनश्याम भुसाल र उपमहासचिव प्रकाश ज्वाला सदस्य रहनुभएको कार्यदल पनि गठन गरेको छ ।

त्यसैगरी सो राष्ट्रिय सम्मेलनको व्यवस्थानका लागि उपमहासचिव गंगालाल तुलाधरको नेतृत्वमा अर्को एउटा कमिटी पनि बनाइएको छ । मंसिरको २८ र २९ गते पुनः सचिवालयको बैठक पनि बोलाउने निर्णय गरिएको छ । पौषको नौ गते स्थायी कमिटी, १० गते पोलिटव्युरो र  ११ र १२ गते केन्द्रिय कमिटीको बैठक बसी राष्ट्रिय महाधिवेशन र राष्ट्रिय सम्मेलनमा प्रश्तुत हुने एजेण्डाबारे छलफल गर्ने निर्णय पनि बैठकले गरेको उपमहासचिव तुलाधरले बताउनु भयो । 

उहाँले भन्नुभयो, ‘राष्ट्रियसभा निर्वाचनका लागि दल दर्ता गर्ने एउटा निर्णय हिजो गरिएको थियो । आज सबैभन्दा बढी प्रतिक्षा गरिएको विषय थियो । राष्ट्रिय महाधिवेशनको । हामीले हाम्रो राष्ट्रिय महाधिवेशन २०८१ सालको जेठको ३, ४, ५, ६ र ७ गते काठमाडौंमा गर्ने निर्णय गरेका छौं । माघको १४ र १५, जहाँ हामीले राष्ट्रिय सम्मेलनको मिति पहिले नै तय गरेका थियौै । त्यो बेला हामीले राष्ट्रिय विधान अनुसार राष्ट्रिय सम्मेलन गर्नेछाैँ । त्यसैगरी यही मंसिरको २८ र २९ गते पुनः सचिवालयको बैठक गर्नेछ । अनि, पौषको नौ गते स्थायी कमिटीको र पौषको १० गते पोलिटव्युरोको र पौषको ११ र १२ गते केन्द्रिय कमिटीको बैठक सम्पन्न गर्नेछौं । हामीले राष्ट्रिय सम्मेलनमा कतिपय विधान व्यवस्थाका बारेमा पनि छलफल गर्नुपर्ने भएको छ । त्यसका लागि पनि एउटा कार्यदल बनाएका छौं । कार्यदलमा उपाध्यक्ष एवं संगठन विभाग प्रमुख बेदुराम भुसाल, महासचिव घनश्याम भुसाल र उपमहासचिव प्रकाश ज्वाला रहनुभएको छ । र, राष्ट्रिय सम्मेलन व्यवस्थापन कमिटीको पनि व्यवस्था गरेको छौं । यसको लागि गंगालाल तुलाधर, यसैगरी हाम्रो राष्ट्रिय महाधिवेशनका लागि दस्तावेज मस्यौदा गर्नका लागि हामीले २७ जना पार्टी अध्यक्ष कमरेड माधवकुमार नेपालको नेतृत्वमा २७ सदस्यीय एउटा मस्यौदा समिति गठन गरेका छौं । त्यसमा हाम्रो पार्टीका केन्द्रिय पदाधिकारीहरु सबै रहनुहुनेछ ।’सचिवालय बैठकले राष्ट्रिय सभा निर्वाचनका लागि दल दर्ता गर्ने निर्णय पनि गरेको छ । 

नेकपा एसराष्ट्रिय महाधिवेशन

प्रकाशित मिति: बुधबार, मंसिर २०, २०८०, ९:२३ बिहान

लेखक: समाचारपाटी