'हाम्रो भुमिका विकास निर्माणसँग पनि जोडिएको छ किनभने जनताबाट निर्वाचित प्रतिनिधि हौँ':-झक्कु सुवेदी

राष्ट्रिय सभा सदस्य झक्कु सुवेदीले सरकार परिवर्तनलाई स्वभाविक रुपमा लिन आवश्यक रहेको बताउनुभएको छ ।
बिहीवार राष्ट्रिय सभको बैठकमा बोल्दै उहाँले यस्तो बताउनुभएको हो । उहाँले पालेका यावत समस्या समाधान गर्न सबैको भुमिका निर्णायक हुने बताउनु भयो । उहाँले राष्ट्रिय सभा सदस्यहरुको भुमिका कानून निर्माण भएको पनि बताउनु भयो । उहाँले राष्ट्रिय सभा सदस्यहरुको भुमिका कानून निर्माणसँगै विकास निर्माण र राजनीतिक भुमिकामा पनि जोडिने बताउनु भयो ।
उहाँले भन्नुभयो, ‘सरकारहरु बन्छन्, परिवर्तन हुन्छन्, हामी हिँड्दा पनि त दुई खुट्टाले हिँड्छौँ कहिले दायाँ र कहिले बायाँ । चार दिनअघिसम्म देशले, सरकारले दायाँ कदम चाल्यो । चार दिन यता बायाँ कदम चाल्यो । यसलाई स्वभाविक रुपमा लिनुपर्छ । हिजो वामपन्थी र लोकतान्त्रिकहरुको सरकार थियो, अहिले वामपन्थीहरको वर्चश्व रहेको सरकार छ । हामीलाई लाग्छ, नेपालका यावत समस्या समाधान गर्नेमा यसको निर्णायक भुमिका हुन्छ । हाम्रो भुमिका भनेको कानून निर्माण गर्ने हो । हाम्रो भुमिका विकास निर्माणसँग पनि जोडिएको छ किनभने जनताबाट निर्वाचित प्रतिनिधि हौँ । हाम्रो राजनीतिक भुमिका पनि हो ।’
उहाँले प्रतिनिधि सभा र राष्ट्रिय सभा फरक भएकाले प्रतिनिधि सभाको छायाँ राष्ट्रिय सभा बन्नु नहुने बताउनु भयो ।