राष्ट्रिय सभा सदस्य देवेन्द्र दाहालले राष्ट्रिय सभालाई वृद्धहरुको सभा भन्ने भाष्यलाई कानून निर्माण र कामले गलत सावित गर्नुपर्ने बताउनुभएको छ ।
बिहीवारको राष्ट्रिय सभाको बैठकमा बोल्दै उहाँले यस्तो बताउनुभएको हो । उहाँले यस पटकको सभामा केही नाम चलेका सदस्यहरु पनि आएको भन्दै सभाको गरिमा झनै थपिएको अनुभुति आफूलाई भएको बताउनु भयो । उहाँले राष्ट्रिय सभा विधायकी अभ्यासमा चेक एण्ड ब्यालेन्सको लागि पनि महत्वपूर्ण भुमिका निर्वाह गर्ने थलो भएको बताउनु भयो । उहाँले प्रतिनिधि सभाबाट आएका विधेयकहरु कानून निर्माणको सन्दर्भमा आएका विधेयकहरु छलफल गर्ने सन्दर्भमा केही समस्याहरु भए भने राष्ट्रिय सभाले सच्याउनुपर्ने बताउनु भयो ।
उहाँले भन्नुभयो, ‘यस पटक यो सभामा मैले चिनेका, नाम सुनेका, चलेका मान्यज्युहरु पनि आउनुभएको छ । त्यसैले गर्दा यसबाट यो सभाको गरिमा माथि उठेको छ भन्ने लागेको छ । यो सभालाई पटक पटक बुढापाकाहरु थन्क्याउने सभा भयो भन्ने चर्चा पनि चलेको छ । त्यसलाई यो सभामा खेलेको भुमिकाबाट त्यो कुरालाई हामीले खण्डित गर्न सक्नुपर्छ । यो सभा विधायकी अभ्यासमा चेक एण्ड ब्यालेन्सको लागि पनि महत्वपूर्ण भुमिका निर्वाह गर्दछ । प्रतिनिधि सभाबाट आएका विधेयकहरु कानून निर्माणको सन्दर्भमा आएका विधेयकहरु छलफल गर्ने सन्दर्भमा केही समस्याहरु भए भने यसले सच्याउनेछ ।’
उहाँले पार्टी भन्दा माथि उठेर पनि राष्ट्रिय सभा सदस्यहरुले आफ्ना भुमिका निर्वाह गर्न सक्नुपर्ने बताउनु भयो ।
—न्युज एजेन्सी नेपाल