च्याउ उत्पादक किसान संघ नेपालको आयोजनामा पुस १५ गते काठमाडौंमा च्याउ मेला तथा परिकार महोत्सव हुने भएको छ ।

शनिवार काठमाडौंमा पत्रकार सम्मेलन गरी यसबारेमा जानकारी गराइएको हो । पत्रकार सम्मेलनमा बोल्दै संघका महासचिव विकास रिमालले पौष १५ गते काठमाडौंको भृकुटीमण्डपमा एक दिने च्याउ मेला सञ्चालन गर्न लागिएको जानकारी दिनुभयो । उहाँकाअनुसार ‘च्याउ किसानको जागरुकता, व्यवसायिक उत्पादनद्वारा आत्मनिर्भरता’भन्ने नारासहित यस वर्ष च्याउ दिवस मनाइँदैछ । हरेक वर्षको पौष १५ लाई राष्ट्रिय च्याउ दिवसका रुपमा मनाउने गरिएको बताउनु भयो । उहाँले मेलामा ४० वटा स्टल रहने र १५ गते बिहान नै कालिमाटी तरकारी तथा फलफूल बजारबाट भृकुटीमण्डसम्म मोटरसाइकल ¥याली हुने जानकारी दिनुभयो । गोभ्रे, कन्ये, किङ वयस्टर र सिताके च्याउ उत्पादनको व्यवहारिक प्रयोगात्मक प्रदर्शनी मेलामा हुने बताउनु भयो । 

पत्रकार सम्मेलनमा संघका अध्यक्ष सन्तोष कार्कीले च्याउमा नेपाल अब छिटै नै आत्मनिर्भर बन्ने बताउनु भयो । उहाँले विदेशबाट आयात हुने गोलो च्याउ प्रतिष्थापन गर्न सफल भएको बताउनु भयो । २०७९–०८० मा ३ लाख १७ हजार ९३३ किलो भन्सारबाट गोलो च्याउ आयात भएको भएपनि २०८०–०८१ मा ८२ हजार ३१० किलो मात्रै आयात भएको बताउनु भयो । 
उहाँले भन्नुभयो, ‘गोलो च्याउको हकमा हामीले २०६१ सालमा दर्ता भएको हो । गोलो च्याउ हाम्रा दुई वटा छिमेकी राष्ट्रहरुबाट अत्याधिक रुपमा आउने गरेको थियो । यसको हामीले धेरै बिरोध गरेका थियौँ । ल्याउनलाई निरुत्साहित गर्ने अभियान चलायौँ । दोस्रो उत्पादन गरेर प्रतिष्थापन गर्नुपर्छ भनेर अभियान चलायौँ । २०७९–०८० मा ३ लाख १७ हजार ९३३ किलो भन्सारबाट आएको छ । लिगल्ली । २०८०–०८१ को डाटामा ८२ हजार ३१० छ । यो ४ गुणा जति घटेको छ । अहिले मंसिरम्मको हेर्नुभयो भने १ हजार २८० किलो मात्रै आयात छ । गोलो च्याउ धेरै उत्पादन गरेर बाहिरबाट आयात हुने च्याउलाई प्रतिष्थापन गरेका छौँ ।’

उहाँले सस्तो र व्यवस्थित उत्पादन प्रणालीसँग प्रतिष्पर्धा गर्न किसान र उत्पादन सक्षम र प्रतिष्पर्धी हुनुपर्ने बताउनु भयो ।

न्युज एजेन्सी नेपाल

प्रकाशित मिति: आइतवार, पुस १४, २०८१, ६:०५ बिहान

लेखक: समाचारपाटी