पूर्वमन्त्री एवं राष्ट्रिय स्वतन्त्र पार्टीका सांसद शिशिर खनालले नेपाल पर्यटन बोर्ड र संस्कृति, पर्यटन तथा नागरिक उड्डयन मन्त्रालयको द्वन्द्वका कारण नेपालको पर्यटन क्षेत्र संकटमा परेको बताउनुभएको छ ।

शुक्रवार सिंहदरबारमा बसेको अन्तर्राष्ट्रिय सम्बन्ध र पर्यटन समितिको बैठकमा बोल्दै उहाँले यस्तो बताउनुभएको हो । उहाँले पर्यटन बोर्डले बजेट एलोकेट गर्न नसक्दा ठूला पर्यटनसँग सम्बन्धित प्रदर्शनीमा नेपालको सहभागिता हुन नसकेको भन्दै समितिको ध्यानाकर्षण गराउनु भयो । उहाँले अझै अक्टोबरमा हुने पर्यटनसँग सम्बन्धित प्रदर्शनीमा बजेट नभएकै कारण नेपालबाट सहभागिता हुन नसक्ने कुरा आइरहेको भन्दै समितिले यसबारेमा गम्भीर रुपमा सोच्नुपर्ने बताउनु भयो ।

उहाँले भन्नुभयो, ‘टुरिजम बोर्डले नेपालको पर्यटन प्रवद्र्धनको काम गर्छ । तर गत हप्तासम्म टुरिजम बोर्डले बजेट एलोकेट गर्न नसकेर हामीले तीन, चार वटा ठूला पर्यटनसँग सम्बन्धित प्रदर्शनीमा नेपालको सहभागिता नरहेको र केही महत्वपूर्ण प्रदर्शनीमा नेपालको सहभागिता नरहनसक्ने कुरा देखिएको छ । त्यो बोर्ड र मन्त्रालयबीचको द्वन्द्वका कारण हो । त्यसमा हामीले गम्भीरतापूर्वक हेर्नुपर्छ ।’सांसद खनालले समितिले सरकारलाई यसबारेमा आवश्यक निर्देशन गर्नुपर्ने बताउनु भयो ।  

राष्ट्रिय स्वतन्त्र पार्टीसांसद शिशिर खनाल

प्रकाशित मिति: शुक्रबार, अशोज ५, २०८०, ५:१८ बेलुका

लेखक: समाचारपाटी