काठमाडौं । आम जनता पार्टीका अध्यक्ष एवं सांसद प्रभु साहले रौतहटमा हालै भएको दुई वटा हत्याकाण्डमा संलग्नहरुलाई पक्राउ गरी कारबाही गर्न सरकारसँग माग गर्नु भएको छ ।
आईतबार प्रतिनिधिसभा बैठकमा आकस्मिक समय लिएर बोल्दै उहाँले शान्ति, सुरक्षा कायम गर्न पनि सरकारको गम्भिर ध्यानाकर्षण गराउनु भयो । अध्यक्ष साहले हावाहुरीपछि आएको चट्याङमा परी ज्यान गुमाएकी रौटहट मौलापुरकी प्रतिमा देवीको परिवारलाई आवश्यक राहत उपलब्ध गराउन पनि सरकारलाई सचेत गराउनु भयो ।
उहाँले रौतहटमै हावाहुरीका कारण आँप, लिची, मकैलगायतका खेती नष्ट भएको उल्लेख गर्दै पीडितलाई क्षतिपूर्तिका व्यवस्था गर्न पनि सरकारको ध्यानाकर्षण गराउनु भयो । अध्यक्ष साहले भन्नु भयो, एक हप्तायता रौतहटमा लगाएर दुई वटा हत्या भयो । गौर सदरमुकाममै छुरा हानेर हत्या भयो । त्यो पाँच दिन पनि नबित्दै रौतहटकै अर्का झण्डै ७० वर्षीय वृद्धको गोली हानेर हत्या भयो ।
यसरी एउटा हत्या आतंकले एउटा त्रासको स्थिति सृजना भएको छ । म सभामुखमार्फत नेपाल सरकारलाई शान्ति, सुरक्षाको अवस्थाको अवस्थामा सुधार गर्न र अपराधीलाई कानुनको दायरामा ल्याउन म विशेष आग्रह गर्न चाहन्छु । केही दिन अगाडि आएको हावाहुरी र चट्याङले मौलापुरमा एक जना प्रतिमा देवीको मृत्यु भयो । उसको श्रीमान विदेश गएको, बच्चा सानासन दुध खाने अवस्थाका छन ।
त्यो परिवार अहिले अलपत्र छ । सरकारले त्यसको व्यवस्थापन गरेर क्षतिपूर्तिको व्यवस्था गर्न म सरकारलाई आग्रह गर्न चाहन्छु । र, त्यो हावाहुरीसँगै खास गरेर आँपका खेती गर्ने आँप व्यवसायीहरुलाई ठूलो क्षति भएको छ । आँप, लिची, केरा खेती गर्नेहरुको हालत बेहाल भएको छ । मकै तहसनहस भएका छन । ती किसानहरुलाई क्षतिपूर्तिको लागि विशेष आग्रह गर्न चाहन्छु ।
अध्यक्ष साहले खेतीबाली नष्ट भएका किसानहरुलाई क्षतिपूर्ति दिने काममा सरकारले ढिलाई गर्न नहुने समेत बताउनु भयो ।