नेकपा एमालेका सांसद ईश्वरबहादुर रिजालले आफ्नो पार्टीलाई पुरानो पार्टी नभनिदिन आग्रह गर्नुभएकाे छ । मंगलबार प्रतिनिधिसभाको आकस्मिक समयमा बोल्दै उहाँले पुरानो र नयाँ पार्टीको भाष्य बनाउन खोजिएको र एमालेलाई पुरानो पार्टीमा राखिएको भन्दै असन्तुष्टि जनाउनुभयाे ।

‘मेरा पार्टी, मेरो दलले इतिहासमा केही कमजोरी गरेको छ भने एक्लै त्यसको जवाफदेही ब्यहोर्न तयार छ । तर, इतिहासमा गरेका राम्रा कामहरु र जो अरुले नराम्रा काम गरेका छन् ती सँग मिसाएर हाम्रो दललाई पुरानो दल भन्ने भाष्य खडा नगरियोस्, त्यसरी नबुझियोस्’ सांसद रिजालले भन्नुभयाे । आफ्नो पार्टी मिसनमा, भिजनमा र एक्सनमा सधैंभरि नयाँ दल रहेको उहाँको जिकिर छ ।

नयाँ दल आउनु स्वभाविक भएको भन्दै उहाँले त्यही आधारमा पुरानो दलको औचित्य नसकिने रिजालले बताउनुभयाे । ‘सौर्यमण्डलमा धेरै ताराहरु जन्मिने गर्छन् । ताराहरु बिलाउने पनि गर्छन् । तर, सूर्य आयूमा पुरानो होला । त्यसको काम पुरानो भएको छैन । त्यसले उज्यालो दिने र ताप दिने काम त्यो नयाँ नै छ’ उहाँले भन्नुभयाे ।

नेकपा एमालेसांसद ईश्वरबहादुर रिजाल

प्रकाशित मिति: मङ्लबार, बैशाख १२, २०८०, २:०४ बेलुका

लेखक: समाचारपाटी