नेकपा(माओवादी केन्द्र)का सांसद हितबहादुर तामाङले चाडपर्वको बेलामा हुने सडक दुर्घटना रोक्न प्रभावकारी रुपमा सडक सुरक्षाको व्यवस्था गर्न सरकारको ध्यानाकर्षण गराउनुभएको छ । 

प्रतिनिधि सभाको आईतवारको बैठकमा बोल्दै सांसद तामाङले नजिकिँदै गरेको चाडपर्वहरु दशैँ र तिहारमा गाउँ आवतजावत गर्दा दुर्घटना हुने गरेको भन्दै सडक सुरक्षाको लागि सरकारको ध्यानाकर्षण गराउनुभएको हो । उहाँले यात्रुहरुले सवारी साधनको अभाव, महंगिको समस्या र टिकट उपलब्धताको समेत समस्या भोग्नुपरेको भन्दै यसप्रति पनि सरकारको ध्यानाकर्षण गराउनु भयो । उहाँले काठमाडौँ उपत्यकामा हुने चोरी र लुटपाटको पनि नियन्त्रण गर्न सरकारलाई अनुरोध गर्नुभयो । 

उहाँले भन्नुभयो – ‘काठमाडौं उपत्यका र मुलुकका विभिन्न शहरहरुबाट धेरै नेपालीहरु गाउँमा जान्छन् । त्यस क्रममा यातायातका साधनहरुको अभाव, महंगिको समस्या, टिकटको उपलब्धतामा समस्या भन्ने कुराहरु आएकै छन् । त्यतिमात्रै होइन सडक दुर्घटनाबाट रोक्नको निमित्त सडक सुरक्षाको व्यवस्था तदारुकता र प्रभावकारी बनाउनको निमित्त म सम्बन्धित मन्त्रालयको ध्यानाकर्षण गराउन चाहान्छु । यात्रुहरुमाथि अनावश्यक दुःख दिने, लुटपाट गर्ने र काठमाडौं उपत्यका लगायतका शहरहरुमा मान्छेहरु कमी हुँदै जान्छन् त्यसबिचमा चोरी बढ्ने, लुटपाटका घटना हुने गर्छन् । त्यस खालका कामहरुलाई रोक्नको निमित्त म गृहमन्त्रीको विशेष ध्यानाकर्षण गराउन चाहन्छु ।’

उहाँले सामाजिक सद्भाव, धार्मिक सहिष्णुता भड्काउने गतिविधिहरुलाई बेलैमा नियन्त्रण गर्नुपर्ने बताउनु भयो । सामाजिक सद्भाव र धार्मिक सहिष्णुता कायम राख्नको निमित्त संसदमा रहेका सबै राजनीतिक दलहरुको तर्फबाट संयुक्त रुपमा पहल गर्नुपर्ने उहाँले बताउनु भयो ।

सडक दुर्घटनासांसद हितबहादुर तामाङ

प्रकाशित मिति: आइतवार, अशोज २१, २०८०, ४:१२ बेलुका

लेखक: समाचारपाटी