राष्ट्रिय स्वतन्त्र पार्टीकि सांसद डा. चन्दा कार्कीले अस्पतालजस्तो संवेदनशील ठाउँमा राजनीतिक भागबन्डाको आधारमा नियक्ति गर्नु नहुने बताउनुभएको छ ।

बिहीवार नयाँ बानेश्वरस्थित संघीय संसद भवनमा सञ्चारकर्मीहरुसँग कुराकानी गर्दै डा। कार्कीले अस्पतालमा राजनीतिक भागबन्डाका आधारमा निर्देशक नियुक्ति हुने गरेको भन्दै त्यसो गर्नु नहुने बताउनुभएको हो । मन्त्री नयाँ आएपिच्छे निर्देशक फेरिँदा अस्पतालको अवस्थाको बारेमा निर्देशकलाई नै थाहा नहुने गरेको उहाँको भनाई छ । उहाँले बिरामीको उपचारमा अस्पतालका भौतिक पूर्वाधार, उपकरण, स्वास्थ्यकर्मी, व्यवस्थापन, सरकारको नीति र अस्पतालका प्रोटोकलको कुरा जोडिने भएपनि चिकित्सकहरुलाई मात्रै दोषारोपण गर्ने गरिएको उहाँले बताउनु भयो ।

उहाँले भन्नुभयो – ‘केन्द्रमा भएको अस्पतालमा आएको बालिकाले बाहिर कुरिराखेर उसको ज्यान जाने जुन कुरा भयो । त्यो जस्तो लज्जास्पद कुरा हाम्रो लागि केही छैन । त्योजति दुखदायी कुरा केही हुँदैन । आयोग गठन गरेर केही हुनेवाला छैन । अस्पतालमा राम्रो सेवा दिनका लागि बृहत्तर रुपमा हेर्नुपर्ने हुन्छ । यहाँ त जहिल्यैपनि स्वास्थ्यकर्मीहरुलाई दोष दिएको देखेको छु । जहिलेपनि आयोग बनायो स्वास्थ्यकर्मीहरुतर्फ अनुसन्धानको सुई फर्कायो अनि अरु बाँकी सबै चोखो । त्यस्तो हुनु हुँदैन । बिरामीलाई राम्रो बनाएर पठाउन अस्पतालका भौतिक पूर्वाधारदेखि त्यहाँका उपकरण, स्वास्थ्यकर्मी र व्यवस्थापनका कुरा । सरकारको नीति र अस्पताका प्रोटोकलका कुरा सबै जोडिएर आउँछ । अस्पतालमा सरकारको प्रतिनिधित्व भनेको अस्पतालको निर्देशक हुन्छ । प्रशासकिय प्रमुख हुन्छ । हामीकहाँ व्यवस्था कुनैपनि निर्देशकको नियुक्ति, कान्तिकै पनि ९ महिनामा ६ वटा निर्देशक बदलिएको हुन्छ । मन्त्री कुन पार्टीको भयो त्यो पार्टीको निर्देशक बनाउने । त्यो निर्देशकलाई केही थाहा हुँदैन । भागबन्डाको राजनीति अस्पताल जस्तो संवेदनशील ठाउँलाई बनाउनु भएन नि ।’

उहाँले काठमाडौंजस्तो केन्द्रमा रहेको कान्ति बाल अस्पतालमा बालिकाले उपचार नपाएर मर्नुपर्ने अवस्था आउनु लज्जास्पद र दुःखदायी कुरा भएको बताउनु भयो ।

राष्ट्रिय स्वतन्त्र पार्टीसांसद डा. चन्दा कार्की

प्रकाशित मिति: शुक्रबार, भदौ २२, २०८०, ८:५९ बिहान

लेखक: समाचारपाटी