भौतिक पूर्वाधार तथा यातायातमन्त्री देवेन्द्र दाहालले सरकारसँग नेपालमा कति सवारीसाधन छन् भन्ने यकिन तथ्यांक नरहेको बताउनुभएको छ ।

मंगलवार मन्त्रालयमा भौतिक पूर्वाधार तथा यातायात मन्त्रालयमा सातै प्रदेशका यातायात संवद्ध मन्त्री र सचिव सहितको विषयगत समितिको बैठकमा बोल्दै मन्त्री दाहालले यस्तो बताउनुभएको हो । उहाँले नेपालसँग कति सवारीसाधनहरु छन् भन्ने यकिन तथ्यांक नहुँदा अन्तर्राष्ट्रिय सम्मेलनमा समेत अनुमानित तथ्यांक दिनुपरिरहेको गुनासो गर्नुभयो । उहाँले अनुमानित ५०÷६० लाख सवारीसाधनहरु रहेको बताउनु भयो । वैशाखसम्ममा नेपालभर रहेका सवारीसाधनहरुको यकिन तथ्यांक संकलन गर्ने बताउनु भयो । 
उहाँले भन्नुभयो, ‘अहिलेसम्म हामीसँग कति भेहिकल छन् भन्नेकुरा एउटा राज्यसँग यकिन तथ्यांक छैन । कति छन् भन्नेकुरा थाहा छैन भनेर भनिरहनुपर्ने कुरा त्यत्ति शोभनिय कुरा होइन । तर भनिरहेका छौँ । कसैले ६० लाख भन्छन्, कसैले ५० लाख छन् भन्छन् । यो वैशाखसम्ममा जसरी पनि यकिन तथ्यांक ल्याउनुपर्छ । अब हामी अन्तर्राष्ट्रिय गोष्ठीमा जानुपर्ने छ । तर त्यहाँ पनि हामीले यस्तै यस्तै डाटा भन्छौँ । कहिले ५० लाख, कहिले ६० लाख भन्छौँ भन्ने चाहीँ गरेका छौँ । त्यसमध्येको ८० प्रतिशत मोटरसाइकल भनेका छौँ ।’मन्त्री दाहालले कुल सवारीसाधनमध्ये ८० प्रतिशत मोटरसाइकल रहेको पनि बताउनु भयो ।

—न्युज एजेन्सी नेपाल

यातायातमन्त्री देवेन्द्र दाहाल

प्रकाशित मिति: बुधबार, फाल्गुन २१, २०८१, ६:०५ बिहान

लेखक: समाचारपाटी