काठमाडौं । पूर्वमन्त्री खेमराज भट्ट ‘मायालु’को निधन भएको छ । क्यान्सर रोगबाट पीडित भट्ट काठमाडौंको बीर अस्पतालमा उपचाररत हुनुहुन्थ्याे ।

उहाँका छोरा आकाशले बिहीबार राति १० बजेर २५ मिनेटमा बुवाको निधन भएको जानकारी दिनुभएकाे छ । उहाँको आजै बिहान पशुपति आर्यघाटमा अन्त्येष्टि गरिएको छ । नेपाली कांग्रेसका सभापति शेरबहादुर देउवा, नेकपा माओवादी केन्द्रकी उपाध्यक्ष पम्फा भुसाल लगायत आर्यघाट पुग्नुभएकाे थियाे ।

डडेलधुरामा जन्मिनुभएका भट्ट गणतन्त्रका लागि आवाज उठाउने अग्रणी नेताहरुमध्ये एक हुनुहुन्छ । रामराजा प्रसाद सिंह नेतृत्वको जनवादी मोर्चाले गणतन्त्र नेपालको लक्ष्य राखेर २०४२ साल असारमा नारायणहिटी राजदरबार, सिंहदरबारजस्ता ठाउँमा बम बिष्फोट गराएको थियो । त्यतिबेला मायालु त्यतिबेला जनवादी मोर्चाको उपाध्यक्ष हुनुहुन्थ्याे ।

२०३० सालतिर स्वर्गीय रामराजा प्रसाद सिंहसँग मिलेर जनवादी मोर्चा गठन गर्नुअघि उहाँको राजनीतिक पृष्ठभूमि नेपाली कांग्रेस निकट थियो । उहाँ मोर्चाबाट २०५३ सालमा फेरि नेपाली कांग्रेसमै फर्किनुभएकाे थियाे ।

२०५६ सालमा बर्दियाबाट प्रतिनिधि सभा सदस्यमा उहाँ निर्वाचित हुनुभएकाे थियाे । २०५८ सालमा गठित शेरबहादुर देउवा नेतृत्वको सरकारमा उहाँ सामान्य प्रशासनमन्त्री हुनुभएकाे थियाे । २०७० सालमा भने उहाँ पुष्पकमल दाहाल प्रचण्ड नेतृत्वको तत्कालीन एकीकृत नेकपा माओवादीमा प्रवेश गर्नुभएका थियाे ।

खेमराज पञ्चायती व्यवस्था विरोधी आन्दोलनका क्रममा पटक–पटक जेलसमेत पर्नुभएकाे थियाे । क्यान्सर रोगबाट पीडित खेमराजलाई वीर अस्पतालमा केही हप्ता अघि चौथोपटक किमो दिइएको थियो । प्रजातन्त्र र गणतन्त्र प्राप्तिको लागि स्वर्गीय मायालुको योगदान स्मरणीय छ ।

onlinekhabar

निधनपूर्वमन्त्री खेमराज भट्ट

प्रकाशित मिति: शुक्रबार, अशोज ५, २०८०, १०:५९ बिहान

लेखक: समाचारपाटी