सङ्घीय मामिला तथा सामान्य प्रशासन मन्त्री अनिता देवीले स्थानीय तहलाई हस्तक्षेप नगर्न सबै प्रतिवद्ध हुनुपर्ने बताउनुभएको छ । बुधवार प्रतिनिधि सभा अन्तर्गतको राज्य व्यवस्था तथा सुशासन समितिको बैठकमा बोल्दै मन्त्री देवीले स्थानीय तहलाई हस्तक्षेप नगर्नका लागि सबै प्रतिवद्ध हुनुपर्ने बताउनुभएको हो । उहाँले भ्रष्टाचारको सन्दर्भमा स्थानीय तहलाई औँला ठड्याइने गरिएको भन्दै उहाँले स्थानीय तहमा आर्थिक अनुशासन कायम गर्ने जिम्मेवारी पनि सबैको भएको बताउनु भयो । स्थानीय तहलाई सही रुपले चलाउने जिम्मेवारी स्थानीय तहका जनप्रतिनिधिको मात्रै नभएर प्रदेश र संघको जनप्रतिनिधिको पनि भएको उहाँले बताउनु भयो । 

उहाँले भन्नुभयो – ‘अहिले हामीले स्थानीय तहलाई औँला उठाएर देखाएका छौँ । तर त्यो स्थानीय तह कस–कसको हो ? भनेर कहिल्यै हामीले भित्रबाट आत्मालोचना गरेका छौँ ? कहिले भन्छौँ कार्यपालिका मेरो हो, उपमेयर, मेयर मेरो हो ? स्थानीय तहको जिम्मेवारी हामी सबैको हो नि त । प्रदेशको बजेट पनि स्थानीय तहमा दिएका छौँ । संघको पनि हामी यहीँ दिएको छौँ । अनि जिम्मा चाहीँ स्थानीय तहलाई मात्रै दिने ? त्यो जिम्मेवारी हामी सबैको हो । त्यो कसरी चलाउने भन्ने । स्थानीय तहको जनप्रतिनिधि कुन–कुन दलको हो ? त्यसलाई हेरौँ न । उपभोक्ता समितिलाई हामी निर्देशित गरौँ न । हामी सिनियर नेता हौँ भने उनीहरुलाई सही बाटो हामी देखाउँ न । हामी देखाउनुपर्यो नि त । कमी, कमजोरी हामी सबैमा देखिरहेका छौँ । स्थानीय तहलाई मात्रै देखाउने ? आजैदेखि हामीले आत्मसाथ गरेर जाउँ कि हामी भोलिदेखि नै स्थानीय तहमा हामीले हस्तक्षेप गर्दैनौँ । गलत गरेको ठाउँमा सही बाटो देखाउँछौँ भनेर ।’मन्त्री देवीले कमी, कमजोरी स्थानीय तहमा मात्रै नभई सबै तहमा हुने गरेको बताउनु भयो ।   

अनिता देवीस्थानीय तह

प्रकाशित मिति: बिहिबार, अशोज २५, २०८०, १२:०८ बेलुका

लेखक: समाचारपाटी