सिन्धुलीमा माइक्रो बस दुर्घटना हुँदा सात जना घाइते,दुई जना गम्भीर

सिन्धुली । सिन्धुलीमा माइक्रो बस दुर्घटना हुँदा सात जना घाइते भएका छन्। काठमाडौंबाट सिन्धुली तर्फ गइरहेको म.प्र.०२–००१.ज.००४२ नम्बरको माइक्रो बस शुक्रबार विपी राजमार्ग अन्तगरत सुनकोसी गाउँपालिका ५ साइटार नजिकै दुर्घटना भएको हो।

घाइते हुनेमा कमलामाई नगरपालिका १ सिन्धुलीका १८ वर्षीय शोभ घिमिरे, सोही नगरपालिका वडा नम्बर २ का १९ वर्षीया सन्ध्या घिमिरे, गोलन्जोर गाउँपालिका ४ सिन्धुलीका ६५ वर्षीय तेजबहादुर बस्याल र वडा नम्बर १ का २१ वर्षीय रामधोज पाख्रिन रहेका छन्।

यस्तै विराटनगर नगरपालिका १२ मोरङका ३२ वर्षीय सत्यप्रकाश ठाकुर, गौशला नगरपालिका ४ महोत्तरीका ६१ वर्षीय पर्शुराम ठाकुर र काठमाडौं महानगरपालिका ८ का ३८ वर्षीय महेश डंगोल रहेका छन्।

घाइते मध्ये शोभा र सन्ध्या घिमिरे गम्भीर छन्। उनीहरुलाई टाउको र शरीरका भित्री भागहरुमा चोट लागेको पाइएको जिल्ला प्रहरी कार्यालय सिन्धुलीका प्रहरी प्रवक्ता तथा प्रहरी नायव उपरीक्षक चिरञ्जिवी दाहालले जानकारी दिनुभयाे ।

घाइतेहरुको गोलन्जोर गाउँपालिका ७ खुर्कोट स्थित शुभजिवन अस्पतालमा उपचार भइरहेको प्रहरीले जनाएको छ । गाडीका चालक कमलामाई नगरपालिका ५ का सुमन श्रेष्ठलाई प्रहरीले नियन्त्रणमा लिएको छ । तीव्र गतिमा रहेको गाडी सडकको नालामा खस्दा दुर्घटना भएको हो । गाडीमा दश जना सवार थिए ।

बस दुर्घटनासिन्धुली