राष्ट्रिय सभा सदस्य कमला पन्तले ४० वटा कानून तत्काल निर्माण गर्नुपर्ने अहिलेको आवश्यकता रहेको बताउनुभएको छ ।

बिहीवारको राष्ट्रिय सभाको बैठकमा बोल्दै उहाँले यस्तो बताउनुभएको हो । उहाँले विगतका सकारात्मक अनुभवहरुबाट अघिल्ला पाइलाहरुलाई देश र जनताको पक्षमा परिणामदायी बनाउन संकल्प गर्नु अहिलेको आवश्यकता भएको बताउनु भयो । उहाँले समुन्नत नेपाल निर्माणको आधार खडा गर्न युद्धस्तरमा काम गर्नुपर्ने भएकाले विश्राम गर्ने छुट नरहेको जिकिर गर्नुभयो । 
उहाँले भन्नुभयो, ‘हाम्रा आफ्ना विगतका सकारात्मक अनुभवहरुबाट हामीले हाम्रा अघिल्ला पाइलाहरुलाई देश र जनताको पक्षमा परिणामदायी बनाउन संकल्प गर्नु अहिलेको आवश्यकता हो । हाम्रा सामुन्ने थुप्रै जिम्मेवारीहरु छन् । संविधान सभाबाट जारी भएको वर्तमान संविधानको पूर्ण कार्यान्वयनको सन्दर्भमा कानून निर्माण बाँकी छ । कानून पूर्ण भइसकेका छैनन् । संविधान निर्माण भइसकेपछि कानून कति निर्माण गर्न बाँकी छ, भन्नेकुरा पनि विधायन समितिले अध्ययन गरिसकेको छ । ४० वटा कानून तत्काल निर्माण गर्नुपर्ने अहिलेको आवश्यकता छ । शान्ति प्रक्रियाको लजिकल इन तथा समुन्नत नेपाल निर्माणको आधार खडा गर्न युद्धस्तरमा काम गर्नुपर्नेछ । हामीलाई विश्राम गर्ने छुट छैन ।’
उहाँले शक्ति निक्षेपणको सिद्धान्तका आधारमा स्थानीय तह र प्रदेश तहलाई थप शक्तिशाली साधन श्रोत सम्पन्न र दक्ष तुल्याइ संघीयताको अर्थपूर्ण अभ्यासलाई बिस्तार गर्न ढिला गर्नु नहुने बताउनु भयो ।

—न्युज एजेन्सी नेपाल

राष्ट्रिय सभा सदस्यसांसद कमला पन्त

प्रकाशित मिति: शुक्रबार, फाल्गुन २५, २०८०, ११:२९ बिहान

लेखक: समाचारपाटी