काठमाडौं । काठमाडौं महानगरपालिकाका मेयर बालेन्द्र शाहले आत्मदाहको सबैभन्दा ठूलो कारण राज्य भएको बताउनुभएकाे छ ।

मंगलबार बानेश्वरस्थित संसद भवन अगाडि आफैंलाई आगो लगाउनुभएका इलामका प्रेमप्रसाद आचार्यको मृत्यु भएपछि सामाजिक सञ्जाल फेसबुकमा स्ट्याटस लेख्दै उहाँले आत्मादाहका धेरै कारण र संकेतहरु भए पनि ठूलो कारण राज्य भएको बताउनुभएकाे हाे ।

‘सबैभन्दा भयानक संकेत राज्यको चरम असफलता हो, उहाँको व्यवसायमा, उहाँको निराशामा, उहाँको सहयोगको याचनामा, उहाँको सुरक्षामा, उहाँको उद्धारमा, उहाँले भोगेका हरेक चरणमा राज्य असफल भएको छ’ बालेनले भन्नुभएकाे छ , ‘राज्यका हरेक तप्का, निकाय र अंगहरु असफल भएका छन् ।’

नागरिकका रुपमा, जनप्रतिनिधिका रुपमा, सत्ताका अगुवाका रुपमा, सञ्चारमाध्यमका रुपमा सबै असफल भइरहेको उहाँले उल्लेख गर्नुभएकाे छ । ‘नागरिकले गर्नुपर्ने सामान्य दायित्व पूरा गर्नुपर्ने चेत हाम्रो छैन, हामीलाई नियम नमान्दा र पालो मिच्दा असामान्य हो भन्ने लाग्दैन’, उहाँले भन्नुभएकाे छ ।

एकैपटक धेरै कुराहरु गलत बाटोमा लागेर एकैपल्ट असफल हुँदा प्रेमप्रसाद आचार्यले त्यसको विद्रोह गरेको बालेनले भन्नुभएकाे छ । ‘त्यो विद्रोह हाम्रो समयको पछिल्लो सबैभन्दा विस्मयकारी घटना हो ।’

प्रेमप्रसाद आचार्यको जस्तो नियति भोग्न नपरोस् भनेर महानगरले सीप सिक्ने र ती सीपहरुको जीवनस्तर वृद्धिमा प्रयोग हुने संरचनाहरुको निर्माण गर्नेमा असाध्यै संवेदनशील भएर काम गरिरहेको उहाँले भन्नुभएकाे छ । ‘नागरिक तहदेखि संघीय सरकारसम्म सबैले आफ्नो भूमिकाबाट कठोर भई निभाउन अपील गर्दछु’, उहाँले भन्नुभएकाे छ ।

आत्मादाहमेयर बालेन्द्र शाह

प्रकाशित मिति: बुधबार, माघ ११, २०७९, १२:३५ बेलुका

लेखक: समाचारपाटी