काठमाडौं I मुम्बई प्रहरीले बलिउड अभिनेता सैफ अली खानमाथि चक्कु प्रहार गर्ने व्यक्तिलाई पक्राउ गरी सार्वजनिक गरेको छ। पक्राउ परेका व्यक्ति मोहम्मद सरीफुल अस्लाम असजाद हुन्, जसले विजोय दासको नामबाट मुम्बईमा बसोबास गर्दै आएका थिए।
प्रहरीका अनुसार असजादको भारतीय नागरिक भएको कुनै प्रमाण फेला परेको छैन। उनी बंगलादेशी नागरिक हुन सक्ने अनुमान गरिएको छ, तर पासपोर्ट वा परिचयपत्र केही पनि फेला नपरेकाले अनुसन्धान जारी छ। मुम्बई प्रहरीका डिसीपी दीक्षित गेदमले पत्रकार सम्मेलनमा भने, “उनी अवैध रूपमा भारत आएका थिए र विगत चार महिनादेखि मुम्बईको ठाणे क्षेत्रमा हाउस किपिङ एजेन्सीमा काम गरिरहेका थिए।”
प्रहरीले प्राप्त कागजातका आधारमा असजाद बंगलादेशी नागरिक हुन सक्ने अनुमान गरेको छ। उनीविरुद्ध राहदानी दुरुपयोग लगायतका मुद्दामा आरोपपत्र दायर गर्ने तयारी गरिएको छ। उनलाई आज अदालतमा पेश गरिनेछ।
प्रहरीको जानकारी अनुसार असजाद सैफ अली खानको घरमा चोरी गर्न घुसेका थिए। यही क्रममा १६ जनवरीको राति २ बजे सैफ अली खानमाथि चक्कु प्रहार भएको थियो। शल्यक्रियापछि सैफ अली खान अस्पतालबाट डिस्चार्ज भइसकेका छन्।