काठमाडौं । खानेपानीमन्त्री महिन्द्र राय यादवले याङ्ग्री र लार्केबाट मेलम्ची खानेपानीको मुख्य सुरुङमा पानी जोडेपछि काठमाडौंमा बाह्रै महिना खानेपानी उपलब्ध हुने बताउनुभएको छ । सोमवार प्रतिनिधि सभा बैठकमा बोल्दै मन्त्री यादवले याङ्ग्री र लार्के छिटोभन्दा छिटो शुरु गर्ने मन्त्रालयको योजना रहेको बताउनुभएको हो ।

उहाँले याङ्ग्री र लार्केबाट पथान्तर गर्ने पानी सिधै सुरुङबाट मेलम्चीमा जोड्नेगरी काम अगाडी बढीरहेको भन्दै यसो हुँदा काठमाडौं उपत्यकामा बाह्रै महिना खानेपानीको उपलब्धता हुने बताउनु भयो । उहाँले काठमाडौं उपत्यकामा खानेपानीको वैकल्पिक व्यवस्थाका लागि ललितपुरको तोस्ने खोला र मकवानपुरको सिस्ने खोलामा अध्यययन भइरहेको बताउनु भयो ।

 
उहाँले भन्नुभयो – ‘याङ्ग्री र लार्के छिटोभन्दा छिटो शुरु गर्ने मन्त्रालयको योजना रहेको छ । मेलम्ची नदीको माथिल्लो भागमा धेरै जोखिम रहेकोले याङ्ग्री र लार्केबाट पथान्तर गर्ने पानी सिधै सुरुङबाट मेलम्चीमा जोड्नेगरी कन्सेप्ट अगाडी बढिरहेको अवस्थामा अन्तिम रुप दिइएको छ ।

सोही अनुसार याङ्ग्री र लार्केको योजना अन्तर्गत पानी मुख्य सुरुङमा जोडिएपछि मेलम्ची खानेपानी आयोजना पूर्ण रुपमा सञ्चालन भइ काठमाडौं उपत्यकाभित्र बाह्रै महिना, चौबिसै घण्टा पानी उपलब्ध हुने सुनिश्चिता हामी दिलाउन चाहन्छौँ । यसका साथै काठमाडौं उपत्यकाका लागी खानेपानी वैकल्पिक व्यवस्थाको लागि ललितपुरको तोस्ने खोला र मकवानपुरको सिस्ने खोलाको अध्यययन कार्य भइरहेको छ ।

काठमाडौं उपत्यकालाई मेलम्ची खानेपानी पूर्ण नयाँ वितरण लाइन प्रणालीबाट पानी वितरण गर्ने लक्ष्य रहेको छ । हाल परीक्षण भइरहेका नयाँ वितरण लाइनबाट केही स्थानमा पानी वितरण भएतापनि अधिकांश पुरानै वितरण सञ्जालबाट पानी वितरण रहेकोले पानी समस्या देखिएका छन् । नवनिर्मित सञ्जालबाट पानी वितरण भएपछि पानीको समस्या समाधान हुने र पानी सिधै उपयोग गर्न सकिने सबैमा जानकारी गराउँछु ।’

काठमाडौं उपत्यकाखानेपानीको वैकल्पिक

प्रकाशित मिति: सोमवार, असार ११, २०८०, ८:३१ बेलुका

लेखक: समाचारपाटी