नेकपा(एकीकृत समाजवादी)का अध्यक्ष माधवकुमार नेपालले शिक्षकहरुको जायज मागहरुलाई सम्बोधन गर्नुपर्ने बताउनुभएको छ । 

शुक्रवार नेपाल राष्ट्रिय उद्योग व्यवसायी महासंघको दोस्रो राष्ट्रिय महाधिवेशनलाई सम्बोधन गर्दै अध्यक्ष नेपालले आन्दोलनरत शिक्षकहरुको उपयुक्त र जायज मागहरुलाई सम्बोधन गर्नुपर्ने बताउनुभएको हो । उहाँले संविधानले माध्यामिक तहसम्मको शिक्षाको जिम्मेवारी स्थानीय तहलाई दिएको भन्दै स्थानीय तहले सो जिम्मेवारी पूरा गर्न सक्नेमा आशंका व्यक्त गर्नुभयो । उहाँले स्थानीय तहले शिक्षण संस्थाको उन्नति र प्रगतिमा भन्दा आफ्ना मान्छेलाई नियुक्त गर्नका लागि मात्रै प्रयोग गर्ने हो कि भन्ने आशंकाका कारण प्रश्न उठिरहेको बताउनु भयो । यद्यपी संविधानले दिएको अधिकारलाई अहिले नै परिवर्तन गर्न नसकिने उहाँको भनाई छ । वार्ता र छलफलबाट तत्कालै सम्बोधन गर्न सकिने कुराहरुलाई सम्बोधन गर्नुपर्नेमा उहाँले जोड दिनुभयो । 
उहाँले भन्नुभयो – ‘शिक्षकहरु आन्दोलित छन् । उनीहरुलाई स्थानिय तहको मातहतमा, माध्यामिक तहको शिक्षाको जिम्मेवारी स्थानीय तहलाई दिइएको छ । माध्यामिक तहसम्मको शिक्षाको जिम्मेवारी के स्थानीय तहले पूरा गर्न सक्छन् ? के त्यसले समष्टिगत पक्ष सोच्न सक्छ ? कि उसले स्कुलमा आफ्नो मान्छेलाई कसरी भर्ना गर्ने ? आफ्ना नजिकका मान्छेलाई पढोस्, नपढोस्, पढाओस्, नपढाओस्, त्यहाँ भर्ना गर्ने र शिक्षण संस्थाको उन्नति र प्रगति भन्दापनि त्यसलाई कसरी उपयोग गर्ने भन्ने कुरामा मात्रै सिमित रहने कुराहरु पनि सोच्न सक्ने स्थिति बन्छ । त्यस हुनाले पनि एउटा प्रश्न उठेको छ । तर संविधान बनाउँदा हामीले समावेशिताको कुरा सोचेर, अधिकारको विकेन्द्रीकरण गर्ने कुरा सोचेर पालिका तहसम्मनै माध्यामिक तहसम्मको शिक्षाको अधिकार दिएका छौँ । तर यो अहिले तुरुन्तै संविधान संशोधन गर भनेर पनि हुने अवस्था छैन । सडकमा उत्रिएका शिक्षकहरुको जायज कुराहरुलाई, उपयुक्त कुराहरुलाई, आजको निम्ति सम्भव हुने कुराहरुलाई छलफल, वार्ता गरेर यो समस्याको समाधान निकाल्नु आवश्यक छ ।’

अध्यक्ष नेपालले देशमा संकटको बादलहरु मडारिएको बताउनु भयो । उहाँले गठबन्धनमा आवद्ध पार्टी र नेताहरु अनुभवि रहेका भन्दै नेताहरु एक ठाउँमा बसेर छलफल गरेमा समस्यामा समाधान निकाल्न सक्ने बताउनु भयो । उहाँले देशको समस्याको समाधान सबैभन्दा बढी कम्युनिष्ट पार्टीले मात्र दिनसक्ने उल्लेख गर्नुभयो । कम्युनिस्ट पार्टीसँग वैज्ञानिक दृष्टिकोण भएको कारण समस्याको समाधान गर्नसक्ने उहाँको भनाई छ । 
उहाँले भन्नुभयो – ‘यो देशमा जुन किसिमको संकटका बादलहरु मडारिँदै छन् । ति सबै संकटका बादलहरुमा के–के पक्षहरुले काम गरिरहेको छ ? यसलाई राम्ररी अध्यययन गरौँ । त्यसलाई समाधान गर्ने उपायको निम्ति अगाडी बढौँ । समस्याको समाधान दिन सक्छौँ । किनभने हामीलाई थाहा छ कि जुन गठबन्धन हामीले बनाएका छौँ त्यहाँ गठबन्धन सरकारमा विभिन्न अनुभव प्राप्त गरेका पार्टीहरु छन् । गठबन्धनका नेताहरु एक ठाउँमा बसेर गम्भिरताका साथ छलफल गर्ने हो भने समाधान निकाल्न सकिन्छ । देशको समस्याको समाधान कम्युनिस्ट पार्टीले नै सबैभन्दा बढी दिन सक्दछ । किनभने कम्युनिस्ट पार्टीसँग वैज्ञानिक दृष्टिकोण छ । कम्युनिस्ट पार्टीसँग देशभक्तिको भावना छ । कम्युनिस्ट पार्टीसँग लोकतन्त्रको मुल्य र मान्यताप्रतिको प्रतिवद्धता छ । यि तीन कुरा भइसकेपछि अरु बाँकी कुराहरु काम गर्ने दौरानमा अनुभवबाट बिस्तारै खारिदै अगाडी बढ्न सकिन्छ । अहिले समस्या के छ भने हामी गम्भिर बन्न सकेका छैनौँ । समस्यामा केन्द्रित हुन सकेका छैनौँ । हामीसँग सिंगो देश बनाउने जुन सोच हुनुपर्ने हो, संकल्प, प्रतिवद्धता हुनुपर्ने हो त्यसको अभाव छ । सबभन्दा पहिले राम्रो, समृद्ध देश बनाउने र देशको मर्यादालाई अन्तर्राष्ट्रिय स्तरमा माथि उठाउने यो सोचका साथ अगाडी बढ्नुपर्छ ।’

उहाँले देशलाई समृद्ध बनाउनका लागि पर्यटन प्रवद्र्धनमा जोड दिनुभयो । त्यसैगरी नेपाली उद्योगि, व्यवसायीलाई राज्यले प्रोत्साहन गर्नुपर्ने उहाँले बताउनु भयो ।

माधवकुमार नेपालमाध्यामिक तह

प्रकाशित मिति: शनिबार, अशोज ६, २०८०, ८:४२ बिहान

लेखक: समाचारपाटी