नेकपा (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले कोशी प्रदेशमा मध्यावधि चुनाव गर्नुपर्ने पक्षमा आफ्नो पार्टी नरहेको बताउनुभएको छ । 

शनिवार काठमाडौंमा आयोजित एक कार्यक्रमलाई सम्बोधन गर्दै अध्यक्ष नेपालले यस्तो बताउनुभएको हो । उहाँले जनता र राष्ट्रलाई पर्ने अर्थको बोझका कारण पुनः निर्वाचन हुनु नहुने बताउनु भयो । उहाँले आफ्नो पार्टीले तेब्बर बढी सिट ल्याउन सक्ने भएपनि देशको आर्थिक अवस्थालाई मध्यनजर गरी मध्यावधि चुनाव नभइ मिलेर सरकार बनाउनुपर्ने बताउनु भयो । उहाँले कोशी प्रदेश सरकार मध्यावधिमा नजानका लागि की मिलेर जानुपर्ने, की कसैलाई साथ दिनुपर्ने र  की चुनावमा जानुपर्ने विकल्पमात्रै रहेको उल्लेख गर्नुभयो । उहाँले मध्यावधि चुनावमा जाँदा आफ्नो पार्टीले अहिलेको संख्याको तेब्बर बढी सिट ल्याउने डरले अन्य पार्टीहरु डराइरहेको दाबी गर्नुभयो । 

अध्यक्ष नेपालले भन्नुभयो, ‘हामीले गठबन्धन सरकार बनाएका छौँ । सबै प्रदेशमा गठबन्धन बनाउँदै जाँदा अहिले कोशीमा सुन्नुभयो तपाईंले । यसबीचमा कति वटा सरकार बनिसके । एउटा मुख्यमन्त्री थिए, उनले राजिनामा दिए फेरि अर्को समस्या बनाउन समस्या भयो, अर्को बन्यो फेरि त्यो ढल्यो, फेरि अर्को बने । यही सिलसिलामा कतिसम्म चल्ने हो ? कारण के हो भने हाम्रो निर्वाचन प्रणाली । निर्वाचन प्रणालीमा प्रत्यक्ष निर्वाचित पनि छ, समानुपातिक पनि छ । फेरि संख्या कस्तो भयो भने दुवै मिल्दा बराबर छ । उसको पनि उत्तिकै संख्या पुग्दो रहेछ, यता पनि उत्तिकै संख्या पुग्दो रहेछ । संख्या बराबर भइसकेपछि जो मान्छे मुल बन्छ, जसलाई सभामुख भनिन्छ, जसको पक्षको मान्छे हो, उसको संख्या त घट्ने भयो । सभामुखबाटै मान्छे भागाभाग भइरहेको छ । त्यो लियो भने हाम्रो संख्या घट्ला भनेर । सभामुखले राजिनामा दिएपछि उपसभामुखले पनि राजिनामा दिएर भाग्ने स्थिति भइरहेको छ । जसले अध्यक्षता गर्छ, उसले भोट अन्तिम बेलामा दिन पाउँछ । बराबरी भयो भने । उसको भोट काउण्ट नभए बराबरी हुँदै हुँदैन । त्यो सबैले गर्दा जटिलता शुरु भएको छ । त्यो जटिलता हल गर्ने भनेको दुई वटा उपाय छ । की मिलेर जानु, की कसैलाई साथ दिनु, की चुनावमा जानु । हामीलाई फरक पर्नेवाला छैन । किनभने हाम्रो साथीहरुको हिसाव चुनाव भयो भनेपनि हाम्रो पार्टीलाई फाइदै हुन्छ । अहिले हामीसँग ४ सिट छ, सिट संख्या बढेर दोब्बर, तेब्बर ल्याउन सक्छौँ भन्ने विश्वास छ । अरु पार्टीहरुको सात्तो गएको छ । यत्रो संख्या छ, ४० सिट जितिएको छ, अर्को पटक २० भन्दा बढ्दैन भनेर डराइरहेका छन् । कोही पार्टीको २९ वटा सिट छ, चुनाव भएपछि त्यो आउँदैन भन्ने डर पनि छ । अरुलाई डर होला, हामी त त्यो बेलामा जति सिट लिनुपर्ने थियो, लिन सकिएन । तैपनि हामी जनता र राष्ट्रलाई पर्ने अर्थको बोझ जुन छ, यो सबै भएकाले सकभर त्यता नगइ कुनै न कुनै उपाय निकालियोस् भन्ने पक्षमा छाैँ । देशको राजनीतिमा हाम्रो ध्यान छ ।’ 

अध्यक्ष नेपालले कोशी प्रदेश सरकार मध्यावधि चुनावमा नगइ टिकाइरहन कुनै उपाय निकालिनुपर्ने बताउनु भयो । 

नेकपा एकीकृत समाजवादी

प्रकाशित मिति: शनिबार, भदौ २३, २०८०, १:४४ बेलुका

लेखक: समाचारपाटी