नेपाली काँग्रेसका नेता कृष्णप्रसाद सिटौलाले जनताको पक्षमा संविधान संशोधन हुनुपर्ने बताउनुभएको छ । बुधवार झापाको कचनकवलमा आयोजित नेपाली काँग्रेसको कचनकवल–सगरमाथा जागरण अभियान शुभारम्भ कार्यक्रममा बोल्दै उहाँले यस्तो बताउनुभएको हो । नेता सिटौलाले संविधान संशोधन कुनै पार्टी र व्यक्तिको पक्षमा हुन नहुने बताउनु भयो । उहाँले जनताको हितमा बाधा गरेको ठाउँमा संविधान संशोधन हुनुपर्ने बताउनु भयो । संविधान जारी भएपछि आजसम्मको राज्य सञ्चालनका बारेमा पनि समीक्षा जरुरी रहेको बताउनु भयो । देशकै ठूलो राजनीतिक दल भएर पनि दोस्रो ठूलो दलका नेतालाई काँग्रेसले प्रधानमन्त्री मानेर अघि बढिरहेको बताउनु भयो । सरकार एमालेको नेतृत्वमा भएपनि सैद्धान्तिक र नीतिगत रुपमा देशलाई अघि बढाउने सन्दर्भमा नेपाली काँग्रेस पार्टीको नीतिगत नेतृत्व रहेको बताउनु भयो । 

नेता सिटौलाले भन्नुभयो, ‘नेपाली काँग्रेस पार्टी समग्रमा नेपाली जनताको अधिकारको लागि संघर्ष गर्दै आएको छ । जनताको आर्थिक प्रगतिका लागि त्यति नै संकल्परत छ । हामी देशको प्रगतिका लागि सबैलाई एकाकार गरेर, सबैलाई हिँडाउन हामी तत्पर छौँ । अहिले नेकपा एमाले र नेपाली काँग्रेसको सरकार छ । ओलीजीले सरकारको नेतृत्व गर्नुभएको छ, एमालेको अध्यक्षले । हामी सरकारमा सामेल छौँ । आजको दिनमा पनि नेपालमा सबैभन्दा ठूलो पार्टी गएको निर्वाचनको मात्रै तुलना गर्ने हो भने नेपाली काँग्रेस पार्टी सबैभन्दा ठूलो र शक्तिशाली पार्टी छ । स्थानीय तहमा पनि र सबैतिर हामी ठूलो पार्टी छौँ । हामी ठूलो पार्टी भएर पनि दोस्रो पार्टी एमालेको नेतालाई प्रधानमन्त्रीमा समर्थन गरेका छौँ । सरकारमा सामेल भएका छौँ । सरकार एमालेको नेतृत्वमा भएपनि सैद्धान्तिक र नीतिगत रुपमा देशलाई अघि बढाउने सन्दर्भमा नेपाली काँग्रेस पार्टीको नीतिगत नेतृत्व रहनेछ । हाम्रो विचारलाई वाद गरेर, हामीले अंगालेको नीतिलाई वाद गरेर संविधानले स्थापित गरेको मार्गलाई वाद गरेर कोही अगाडि जान सक्दैन । त्यसैले हामीले भन्ने गरेका छौँ, संविधान संशोधन गरौँ, जनताको पक्षमा । पार्टी विशेषको पक्षमा होइन । नेता विशेषको पक्षमा होइन, संविधानको कुन धाराले जनताको हितमा बाधा पारेको छ, स्थानीय सरकारलाई जनताको काम गर्न केले बाधा गरेको छ ? प्रदेश सरकारलाई केले बाधा ग¥यो । संघीय सरकारलाई केले बाधा गरेको छ । संविधान जारी भएपछि आजसम्म राज्य सञ्चालन कसरी भयो त्यसको समीक्षा गरौँ ।’ 

नेता सिटौलाले अहिलेसम्म संघीय शिक्षा ऐन बन्न नसक्नु दुःखको विषय भएको बताउनु भयो । सबै जाति बलियो भएमात्रै देश बलियो हुने बताउनु भयो ।

—न्युज एजेन्सी नेपाल

प्रकाशित मिति: बिहिबार, पुस २५, २०८१, ६:०५ बिहान

लेखक: समाचारपाटी