काठमाडौं । नेपाल विद्युत् प्राधिकरणका कार्यकारी निर्देशक कुलमान घिसिङले लोडसेडिङ हुँदा खुसी हुने जमातले आफ्नो विरोध गर्ने गरेको गुनासो गर्नुभएकाे छ। प्राधिकरणको वार्षिकोत्सवको सन्दर्भमा बिहीबार काठमाडौंमा आयोजित सम्मान तथा पुरस्कार वितरण कार्यक्रममा उहाँले प्राधिकरण घाटामा जाँदा र लोडसेडिङ हुँदा खुसी हुने जमात ठूलो रहेको र उनीहरुले विरोध गर्ने गरेको गुनासो गर्नुभयाे।

केही जिम्मेवार पदाधिकारी लगायतले जिम्मेवार ठाउँमा पुगेर प्राधिकरणको हिसाबकिताबप्रति आशंका व्यक्त गर्ने गरेको भन्दै घिसिङले महालेखा परीक्षकको ३ वटा संस्थाले अडिट गरेको हिसाब कसरी फेक हुन्छ भन्दै प्रश्न गर्नुभयाे। उहाँले प्राधिकरण सरकारको ठूलो संस्था भएकाले जिम्मेवारीपूर्वक नै काम गरिरहेको स्पष्ट पार्नुभयाे। उहाँले आठ वर्षअघि ३५ अर्ब सञ्चित घाटामा रहेको प्राधिकरण ४७ अर्ब नाफामा पुग्नु ठूलो विषय भएकाे बताउनुभयाे।

नेपालको विद्युत क्षेत्रमा ठूलो क्रान्ति भएको र अहिले सबै क्षेत्रमा विधुतीय गाडीहरू सञ्चालन हुन थालेको उहाँले बताउनुभयाे। घिसिङले वितरण प्रसारण र उत्पादनमा मात्रै प्राधिकरणले १ खर्ब लगानी गरेको बताउनुभयाे। उहाँले आफ्नो दोस्रो कार्यकालको अन्तिम वार्षिकोत्सव मनाउने बर्ष भएको र अर्को वर्ष साउन २५ गते आफ्नो चार वर्षे कार्यावधि समाप्त भएपछि प्राधिकरणबाट बिदा लिने बताउनुभयाे।

कुलमान घिसिङनेपाल विद्युत् प्राधिकरण

प्रकाशित मिति: बिहिबार, साउन ३१, २०८१, ५:०२ बेलुका

लेखक: समाचारपाटी