नेपाली काँग्रेसका नेता तथा पूर्वमहामन्त्री कृष्णप्रसाद सिटौलाले महासमिति बैठकबाट पार्टीभित्र देखिएका असमझदारीहरु मेटिएको बताउनुभएको छ । 

बिहीवार महासमिति बैठक समापन कार्यक्रमलाई सम्बोधन गर्दै नेता सिटौलाले महासमिति बैठक भव्यताका साथ ऐतिहासिक ढंगले सम्पन्न भएको बताउनुभएको छ । उहाँले महासमिति बैठकले पार्टी नेता तथा कार्यकर्ताहरुका बीचमा वृहत एकता भएको र असमझदारीहरु मेटिएको बताउनु भयो । उहाँले अब काँग्रेसले एउटा लाइन बसाल्ने र आगामी निर्वाचनमा काँग्रेसको बहुमत आउनेगरी पार्टीको संगठन परिचालन हुने बताउनु भयो । 

उहाँले भन्नुभयो – ‘महासमिति बैठक भव्यताका साथ ऐतिहासिक ढंगले सम्पन्न भएको छ । एउटा उत्साह बोकेर हामीहरु आ–आफ्नो जिल्ला फर्कदै छौँ । एउटा विचार बोकेर जिल्ला फर्किदै छौँ । र हाम्रा तमाम कार्यकर्ता साथीहरुलाई बृहत एकतावद्ध गर्दैछौँ । हाम्रो बिचमा बृहत एकता भएको छ । अलिअलिक असमझदारी केहि थियो भनेपनि सबै मेटिएको छ । पूर्ण समझदारी हाम्रो बिचमा भएको छ । केन्द्रमा भएको छ । महासमितिको बिचमा भएको छ । अलिअलि हो–हल्ला भयो त्यसले पनि अलिअलि उत्साह थपेकै छ । केही बिग्रिएको छैन । म सबै साथीहरुको स्प्रिटको उच्च कदर गर्न चाहान्छु । प्रस्ताव प्रश्तुत गर्ने केन्द्रका साथीहरुलाई आभार प्रकट गर्न चाहान्छु । उच्च कदर पनि गर्न चाहन्छु । पार्टीको नीति के हो, रणनीति के हो सबै कुरामा केन्द्रले गम्भिरतापूर्वक छलफल गर्नेछ । हामी एउटा लाइन बसाल्नेछौँ काँग्रेस हार्दैन । आगामी निर्वाचनमा काँग्रेसले सम्पूर्ण रुपबाट वृहत परिचालन आफूलाई गरेर बहुमतका साथ परिणाम निकाल्न सक्नेगरी पार्टीको संगठन परिचालन हुनेछ । हामी सबै मिलेर गर्नेछौँ । एकताको सन्देश दिनेगरी महासमिति बैठक विगतको भन्दा अत्यन्त उच्चस्तरमा सम्पन्न भएको छ ।’
उहाँले मुलुकमा देखिएका समस्या समाधान गर्ने क्षमता काँग्रेससँग मात्रै रहेको बताउनु भयो । उहाँले काँग्रेस मुलुकको राजनीतिको पथप्रदर्शक भएको उल्लेख गर्नुभयो ।

—न्युज एजेन्सी नेपाल

कृष्णप्रसाद सिटौला

प्रकाशित मिति: शुक्रबार, फाल्गुन ११, २०८०, १:५९ बेलुका

लेखक: समाचारपाटी