सरकारले प्रश्तुत गरेका सिद्धान्त र प्राथमिकताले पुँजीवादी पक्षलाई समातेको छः- नेकपा एमाले

नेकपा एमालेका अध्यक्ष केपी शर्मा ओलीले सरकारले संसदमा प्रश्तुत गरेको आगामी आर्थिक वर्ष २०८१—०८२ को बजेटका सिद्धान्त र प्राथमिकताले नेपालको वर्तमान आवश्यकतालाई नचिन्ने बताउनुभएको छ ।

आईतवार संसद भवनमा पार्टीका सांसदहरुलाई प्रशिक्षण दिँदै अध्यक्ष ओलीले यस्तो बताउनुभएको हो । उहाँले सरकारले प्रश्तुत गरेको सिद्धान्त र प्राथमिकता हेर्दा विगतकै वर्षहरुको जस्तो रहेको बताउनु भयो । उहाँले सरकारले प्रश्तुत गरेको सिद्धान्त र प्राथमिकताले पुँजीवादी पक्षलाई समातेको जिकिर गर्नुभयो । उहाँले गरिबी निवारण उद्देश्य बनाएर त्यसका निम्ति चाल्नुपर्ने कदम सिद्धान्त र प्राथमिकतामा नरहेको बताउनु भयो ।

उहाँले भन्नुभयो, ‘हामीले गत वर्षको जस्तो बजेट पाएका छौँ । अत्यन्तै हानिकारक । विगत दुई वर्षका बजेटहरु वास्तवमा पुँजीवादी, नेपालको वर्तमान आवश्यकतालाई चिन्दै नचिनेका, बुझ्दै नबुझेका बजेटहरु आए । यस सिद्धान्त र प्राथमिकता भनेर जुन आएको छ, यसले त्यही पुँजीवादी पक्षलाई समातेको छ । यसले गरिबी निवारण एउटा उद्देश्य बनाएर त्यसका निम्ति चाल्नुपर्ने कुनकुन कुराहरु प्राथमिकताका हुन् भन्ने जस्ता कुराहरु गरेको छैन । हामीले राष्ट्रिय पुँजीको विकास, राष्ट्रिय आत्मनिर्भर अर्थतन्त्रको विकास र त्यसतर्फको यात्र ति कुराहरुलाई लिएर जानुपर्ने हो । तर त्यो भइरहेको छैन । यसले त्यसलाई बोक्दैन । सिद्धान्तका ठाउँमा सिद्धान्त छैन । प्राथमिकताका ठाउँमा प्राथमिकता छैन ।’

अध्यक्ष ओलीले अर्थतन्त्र परिचालन गर्न र विकास अघि बढाउनका लागि सिद्धान्त र प्राथमिकता सरकारले नल्याएको दाबी गर्नुभयो ।

—न्युज एजेन्सी नेपाल

केपी शर्मा ओलीनेकपा एमाले