काठमाडौं । नेकपा एमालेका अध्यक्ष केपी शर्मा ओलीले सरकार गठनको बेला भएको सहमति अनुसार गृह मन्त्रालय राष्ट्रिय स्वतन्त्र पार्टी (रास्वपा)लाई नै दिनुपर्ने बताउनुभएकाे छ । सरकार गठनको बेला सत्ता साझेदार दलबीच गृह मन्त्रालय रास्वपालाई दिने सहमति भएको भन्दै उहाँले त्यही सहमति अनुसार हुनुपर्ने उहाँको भनाइ छ ।

आज विराटनगर विमानस्थलमा पत्रकारहरुको जिज्ञासामा ओलीले भन्नुभयाे, ‘हामीले गृह मन्त्रालय रास्वपालाई दिएको हो । अदालतको पूर्णपाठ किन चाहियो ?’

प्रधानमन्त्री प्रचण्डले रविको नागरिकताको विषयमा अदालतको पूर्णपाठ नआएसम्म गृहमन्त्रालय नदिने भनेको बारे पत्रकारको जिज्ञासामा ओलीले भन्नुभयाे, ‘पूर्णपाठ किन चाहियो, कण्ठ गर्नलाई हो ?’

उहाँले यो छलफल गर्नुपर्ने विषय नै नभएको बताउनुभयाे । ‘छलफल भइरहेको छ, तर खटपट छैन,’ ओलीले भन्नुभयाे, ‘यो छलफल गर्नुपर्ने विषय पनि होइन ।’

राष्ट्रपति निर्वाचन र गृह मन्त्रालय कसलाई दिने भन्ने विषयका कारण वर्तमान सरकार संकटमा पर्छ जस्तो आफूलाई नलागेको ओलीले बताउनुभयाे । उहाँले भन्नुभयाे, ‘तपाईंहरुले भनेजस्तो सरकार संकटमा पर्छ जस्तो लाग्दैन ।’

राष्ट्रपति निर्वाचनको सन्दर्भमा माओवादी कांग्रेसतिर ढल्किएको भनेर राखिएको जिज्ञासामा ओलीले माओवादीका केही नेताहरुले त्यसरी बोले पनि आफूलाई भने त्यस्तो नलागेको बताउनुभयाे ।

केपी शर्मा ओलीगृह मन्त्रालय

प्रकाशित मिति: बिहिबार, माघ १९, २०७९, १:११ बेलुका

लेखक: समाचारपाटी