काठमाडौं । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले नेपालमा ‘भूमि बैंक’ स्थापना गर्नुपर्नेमा जोड दिनुभएको छ । 

बाँझो जमिनलाई परिचालन गरी कृषि उत्पादन बढाउन मुलुकमा भूमि बैंक आवश्यक रहेको ओलीको भनाई थियो । मंगलबार च्यासलस्थित पार्टी केन्द्रिय कार्यालयमा पार्टीको कृषि तथा पशुपंक्षी विभागले आयोजना गरेको एक कार्यक्रममा बोल्दै उहाँले तराईमा ठूल्ठूला जमिन चक्लाबन्दी गरी खेती गर्न पनि सो बैंक अतिआवश्यक रहेको बताउनु भयो ।

ओलीले पहाडमा भने कृषि उत्पादन बढाउनका लागि सहकारीकै विधि उपयुक्त हुने तर्क गर्नुभयो । उहाँले नेपालमा ५ वर्ष भित्र कृषि उत्पादन ८० प्रतिशत वृद्धि गर्न सकिने जिकिर समेत गर्नुभयो । त्यसका लागि कृषिमा आधुनिक औजारहरु, उन्नतस्तरको बीउविजन, मल, सिंचाईको प्रवन्ध गर्नुपर्ने ओलीले बताउनु भयो । 

उहाँले भन्नुभयो,  ‘भूमि बैंकमा लगेर आफ्नो जमिन राख्ने र त्यसलाई चक्लाबन्दीको रुपमा त्यसमा फार्मिङ गर्ने कुरा तराईमा सबभन्दा बढि उपयोगी हुन्छ । पहाड सहकार्य नै काफी हुन्छ । सुन्तला यहाँ राम्रो हुन्छ । यसको बजार राम्रो छ भनेपछि त्यहाँका मानिसले सुन्तला खेती गर्न सक्छन । कृषि उत्पादन ५ वर्षमा कम्तिमा असी प्रतिशत बढाउन सकिन्छ ।

यसमा खाली उत्पादन र उत्पादकत्व वृद्धिमा मात्रै असी प्रतिशत कसरी हुन्छ ? मलाई लाग्छ यो त हन्ड्रेड प्रतिशत पुयाउन सकिन्छ ।’

अध्यक्ष ओलीले नेपालमा कृषिका लागि सिंचाईको अभाव नहुने दावी समेत गर्नुभयो । उहाँले माटोलाई स्वस्थ राख्नका लागि प्राङ्गारिक मलको प्रयोगमा वृद्धि गर्दै लैजानुपर्ने बताउनु भयो । 

केपी शर्मा ओली

प्रकाशित मिति: मङ्लबार, असार १९, २०८०, ८:२३ बेलुका

लेखक: समाचारपाटी