काठमाडौं I नेकपा एमालेले उपनिर्वाचनको नतिजाबाट शहरी क्षेत्रको सन्दर्भमा पार्टीलाई अझै मिहिनेत गर्नुपर्ने शिक्षा प्राप्त भएको निष्कर्ष निकालेको छ। पार्टीको केन्द्रीय कमिटीको बैठकमा प्रस्तुत गरिएको राजनीतिक प्रतिवेदनमा उपचुनावमा अपेक्षित मत ल्याउन नसकेको र शहरी क्षेत्रमा पार्टीको आकर्षणमा कमी देखिएको उल्लेख गरिएको छ।

प्रतिवेदनमा भनिएको छ, "विगतमा जितेका वडामध्ये एउटामा मात्र विजय कायम हुनु, कीर्तिपुर जस्तो ठाउँमा अपेक्षित परिणाम हासिल नहुनु र सहरिया जनमतमा अपेक्षित आकर्षण बढ्न नसक्नु हामीले गम्भीरतासाथ लिनुपर्छ।" यद्यपि, उपचुनावको नतिजालाई भविष्यका निर्वाचनको पूर्वानुमानको रूपमा लिने कुरा एमालेले नकारेको छ।

एमालेले उपचुनावमा १.२६ प्रतिशत मात्र मतदाताले भाग लिएको र त्यसैले भविष्यको संकेतको रूपमा यसलाई बुझ्न सकिने आधार नभएको भनेको छ। तथापि, सानो संख्यामा भएको उपनिर्वाचनबाट महत्वपूर्ण शिक्षा लिनुपर्ने भन्ने प्रतिवेदनमा उल्लेख गरिएको छ।

“२०७९ को तुलनामा सम्बन्धित ठाउँमा मतदाताहरूको बदलिंदो रुझान, जनप्रतिनिधिहरूको असन्तुष्टि र नयाँ दल र राजावादी शक्तिहरूको खस्किंदो अवस्थालाई बुझ्न यसले केही आधार दिन्छ,” प्रतिवेदनमा भनिएको छ।

एमालेका अनुसार, आफूले विजय हासिल गरेका स्थानहरूमा पार्टी र जनप्रतिनिधिहरूले थप मिहिनेत गर्नुपर्ने र शहरी मतदाता बीच अझै पार्टीको आधार बलियो बनाउनुपर्ने आवश्यकता रहेको छ।

नेकपा एमालेले उपनिर्वाचन

प्रकाशित मिति: आइतवार, पुस २१, २०८१, ३:१७ बेलुका

लेखक: समाचारपाटी