महिला तथा सामाजिक मामिला समिति सभापति किरणकुमार साहले स्व. आरती साहका दोषीलाई कारबाही नगरे गृह मन्त्रालय र संसदको वेल घेराउ गर्न बाध्य हुने चेतावनी दिनुभएको छ । 

बिहीवार सिंहदरबारमा बसेको समितिको बैठकमा बोल्दै उहाँले घटनामा जिल्ला प्रहरी कार्यालय धनुषाका एसपी र डिएसपी संलग्न रहेको देखिएको भन्दै उनीहरुमाथि कारबाही प्रक्रिया अघि नबढाए संसदभित्र छलफलको विषय बनाएर सांसदहरु गृहमन्त्रालय घेराउ गर्ने र संसदको वेल घराउन गर्न बाध्य हुने बताउनुभएको हो । उहाँले हिरासतमा लिइएका व्यक्तिलाई यातना दिने काम प्रहरी प्रशासनले गरेको पाइएको भन्दै प्रशासन नाङ्गै नाच्नेकुरा अकल्पनीय र दुःखदायी भएको बताउनु भयो । 
उहाँले भन्नुभयो, ‘पीडितले आफैँ कानको जाली फुटाउने र आफैँ नै गुप्ताङ्गमा कुनै सामान हालेर त्यस्तो ब्लडिङ गर्ने काम गर्छ त । कदापि गर्न सक्दैन । एउटा महिलाले जो एउटा कन्या कुमारी छ, जसको बिहेको सवाल छ, उसको जिन्दगीको सवाल छ, आरती साह मरिसकेको अवस्था छ, त्यो अवस्थामा त्यसरी हुनु भनेको दुखद् कुरा हो । ज्यादती भएको छ, आरती साहको आमालाई, बुवा, मामा, बहिनीलाई हिरासत भित्र राखेर त्यस्तो यातना दिएको छ, हिरासतमा राखेर । यो त गुण्डाराज जस्तै भइसकेको छ । यस्तो प्रशासन नाङ्गै नाच्छ भने यो त धेरै अकल्पनीय कुरा हो । दोष एसपी र डिएसपी देखिएको छ, यसलाई कडा रुपमा कारबाही अघि बढाउँछौँ । कारबाही अघि बढाएन भने संसदभित्र छलफलको विषय बनाएर भएपनि हामी सांसदहरु गृहमन्त्रालय घेराउ गर्ने भएपनि संसद भित्र वेल घर्ने भएपनि त्यसको लागि हामी तयार छौँ ।’

समितिको बैठकमा गृह मन्त्रालयका सहसचिव नारायणप्रसाद भट्टराईले आरती साह मृत्युप्रकरणका दोषी कोहीलाई पनि सरकारले नछोड्ने बताउनु भयो । उहाँले अदालतले दोषी देखाए जो कोही पनि कारबाहीको दायरामा आउने बताउनु भयो । उहाँले सरकारले अनुसन्धानमा कुनै कमजोरी हुन नदिने प्रतिवद्धता जनाउनु भयो । उहाँले प्रहरीले ज्यादती गरेको ठहरिए ति प्रहरीहरुको निलम्वन गर्न सरकार पछि नहट्ने पनि बताउनु भयो । 

उहाँले भन्नुभयो, ‘यो घटना पछि यो आत्महत्या हो की हत्या हो भन्ने विषयमा प्रहरी कार्यालय र पीडितहरुको बीचमा केही समय छलफल भएको देखिन्छ । छलफल हुनुलाई मात्रै अन्यथा मान्न सकिँदैन । छलफलपछि उहाँको जाहेरी दर्ता भएर अहिले मृतकको श्रीमान र सशुरा पूर्पक्षका लागि थुनामा हुनुहुन्छ । पीडितको माग के पनि छ भने देवर र सासुलाई पनि पक्राउ गर्नुपर्छ, पोस्टमार्टम रिपोर्ट नआउँदासम्म उहाँहरुलाई हिरासतमा राख्नुपर्छ भन्नुभएको थियो, शुरुदेखिको माग छ, तर भोलि अदालतले जसजसलाई दोषी देखाउँछ, दोषीहरु कानूनी कारबाहीमा आउँछन् । मृत्यु वा मारिएको केसमा कोको दोषी हो भन्नेकुरा अदालतले नै बोल्ने कुरा हो । हामीले त्यसमा अपराधको अनुसन्धान गर्ने क्रममा गृह मन्त्रालयले मातहतका निकायहरुलाई स्पष्ट निर्देशन दिइसकेको छ, त्यसमा कुनै कमी कमजोरी हुन दिइने छैन । मृत्युको केसको कारबाही अदालत प्रवेश गरिसकेको छ । न्यायको बाटोमा छ, न्याय पाउनुभएको छ म भन्दिन । सत्यतथ्य निष्पक्ष अनुसन्धान टुंग्याएर त्यसलाई अदालतमा पेस गरेपछि अदालतले जे आदेश गर्छ त्यो अनुसारको सजाय हुन्छ । प्रहरीले ज्यादती गरेको छ भन्नेकुरा पीडितको पक्षबाट आएको छ । हामीले उहाँहरुलाई अनुरोध गरेका थियौँ, तपाईहरुलाई सुरक्षाका लागि के चाहिन्छ, हामी गर्छौं, छुट्टै सुरक्षाकर्मी खटाएर पनि सुरक्षा दिन्छौँ, फिल्डमा गएर सत्य बताइदिनुहोस् भन्नुभयो, यहाँ दुविधा परेको छ, गृहमन्त्रालयलाई । उहाँहरु पुलिसहरु नहटाएसम्म जाँदैनाैँ भन्नुभयो । अनुसन्धानबाट पनि गल्ती देखियो भने गल्ती गर्ने प्रहरीलाई निलम्वन होइन, जागिर नै खान पनि हामी पछि पर्दैनौँ, गल्ती गर्नेलाई संरक्षण गर्दैनौँ । डिएसपीको त सरुवा गरिसकेका छौँ, आवश्यक परे एसपीको पनि सरुवा गर्न सकिन्छ ।’

उहाँले पीडित पक्षहरुलाई घटनास्थलमै गएर अनुसन्धानमा सघाउन अनुरोध गर्दा नमानेकोप्रति दुःख व्यक्त गर्नुभयो । आरती साह जनकपुरधाम उपमहानगरपालिका–९ थापाचोककी साह ७ जेठमा आफ्नै घरमा मृत भेटिएकी थिइन् । सो घटनामा प्रहरीले उनका श्रीमान मोतीबाबु र ससुरा मदनमोहनलाई हिरासतमा राखेर अनुसन्धान गरिरहेको छ ।  माईती पक्षले आरतीको हत्या गरिएको भन्दै छानबिनका माग गर्दै आएका छन् । 

चेतावनीसभापति किरणकुमार साह

प्रकाशित मिति: बिहिबार, अशोज ४, २०८०, ३:५८ बेलुका

लेखक: समाचारपाटी