काठमाडौं I काठमाडौं गोरखाजले नेपाल प्रिमियर लिग (एनपीएल) क्रिकेट प्रतियोगितामा आफ्नो पहिलो जित हात पारेको छ। सोमपाल कामीको कप्तानीमा रहेको कर्णाली याक्सलाई ३ विकेटले पराजित गर्दै काठमाडौंले २ खेलबाट २ अंक जोडेको छ।

कर्णालीले दिएको १५० रनको लक्ष्य काठमाडौंले १९.३ ओभरमा ७ विकेट गुमाउँदै १५३ रन बनाउँदै पूरा गर्‍यो।

काठमाडौंका सुमित महर्जन खेलका नायक बने। उनले ३७ बलमा अविजित ४० रन बनाउँदै टोलीलाई जित दिलाए। सुमितले ३ चौका र १ छक्का प्रहार गरेका थिए। कप्तान करण केसीले पनि विष्फोटक इनिङ्स खेले। उनले १० बलमा २ चौका र २ छक्काको मद्दतले २८ रन बनाए।

अन्तिम ओभरको पहिलो बल वाइड भएपछि सुमितले चौका प्रहार गरी जित सुनिश्चित गरे। त्यसपछि तेस्रो बलमा उनले अर्को चौका हिर्काउँदै खेल काठमाडौंको पक्षमा समाप्त गरे।

त्यसअघि कर्णाली याक्सले टस हारेर पहिले ब्याटिङ गर्दै २० ओभरमा ५ विकेट गुमाएर १४९ रन बनाएको थियो। पहिलो खेलमा असफल भएका शिखर धवनले उत्कृष्ट प्रदर्शन गर्दै अविजित ७२ रन बनाए। उनले ५१ बलमा ४ चौका र ५ छक्का प्रहार गरेका थिए।

जेरार्ड एरासमसले काठमाडौंका लागि बलिङमा २ विकेट लिए। करण केसी, नाथन सोटर र दिपेश कँडेलले समान १-१ विकेट झारे।

पहिलो खेलमा जनकपुर बोल्ट्ससँग पराजित भएको कर्णालीलाई यो लगातार दोस्रो हार हो। बलियो कागजी टोली मानिएको कर्णालीले अहिलेसम्म आफ्नो क्षमता देखाउन सकेको छैन।

काठमाडौंको जितले टोलीको मनोबल बढाएको छ। पहिलो खेलमा चितवन राइनोजसँग हार ब्यहोरेको काठमाडौंले अब प्रतियोगितामा थप आत्मविश्वाससहित अघि बढ्ने संकेत दिएको छ।

कर्णाली याक्सकाठमाडौं गोरखाज

प्रकाशित मिति: बुधबार, मंसिर १९, २०८१, १:२४ बेलुका

लेखक: समाचारपाटी