नेपाल चेम्बर अफ कमर्सका अध्यक्ष कमलेशकुमार अग्रवालले संसदका दुई ठूला राजनीतिक दल मिलेर सरकार बनाएपनि आर्थिक सुधार हुन नसकेको बताउनुभएको छ ।

शनिवार काठमाडौंमा नेपाल आर्थिक पत्रकार संघको १५ औं साधारण सभामा बोल्दै उहाँले यस्तो बताउनुभएको हो । उहाँले संसदका दुई ठूला राजनीतिक दल मिलेर सरकार बनाएपछि निजी क्षेत्रले आर्थिक सुधार हुने अपेक्षा राखेपनि आर्थिक सुधार हुन नसकेको बताउनु भयो । उहाँले मौद्रिक नीति पनि कछुवाको गतिमा सुधार भइरहेको बताउनु भयो । उहाँले चितुवाको गतिमा नीतिगत सुधार हुनुपर्नेमा जोड दिनुभयो । 

उहाँले भन्नुभयो, ‘संसदका दुई ठूला दलहरु मिलेर सरकार बनेपछि निजी क्षेत्रले धेरै आशा लिएको थियो । तर अहिलेसम्म खै आर्थिक सुधार त्यति हुन सकेको छैन । श्रावणमा केन्द्रिय बैंकले लचिलो मौद्रिक नीतिको शुरुवात गरेको थियो र आशा थियो कि त्यो मौद्रिक नीति क्रमशः सुधारोन्मुख हुन्छ भनेर तर पनि अत्यन्त ढिलो गतिले सुधारोन्मुख छ । कछुवाको तालले मात्रै चलिरहेको छ । चितुवाको गतिले नीतिगत सुधारहरु हुनुपर्यो ।’ 

अध्यक्ष अग्रवालले देशलाई आर्थिक दृष्टिकोणले नयाँ दिशा दिन निजी क्षेत्र तयार रहेको बताउनु भयो । शिथिल अर्थतन्त्रबाट उन्मुक्ति नपाएसम्म क्रेडिट रेटिङले मात्रै नहुने बताउनु भयो ।

—न्युज एजेन्सी नेपाल

कमलेशकुमार अग्रवालनेपाल चेम्बर अफ कमर्स

प्रकाशित मिति: शनिबार, मंसिर २९, २०८१, १:५७ बेलुका

लेखक: समाचारपाटी