काठमाडौं। इजरायल र हमासबीच १५ महिनासम्म जारी रहेको गाजाको युद्ध अन्त्य गर्न युद्धविराम सम्झौतामा सहमति भएको छ। बीबीसीले स्रोतहरूलाई उद्धृत गर्दै जनाएको छ कि दुवै पक्ष स्थायी युद्धविरामको लागि तयार भएका छन्, यद्यपि सम्झौताको औपचारिक घोषणा भने गरिएको छैन।
यो सम्झौताले लाखौं विस्थापित गाजावासीहरूलाई घर फर्कन अनुमति दिनेछ भने बन्धकहरूको रिहाइ सुनिश्चित गर्नेछ। हमासले ७ अक्टोबर २०२३ मा दक्षिणी इजरायलमा आक्रमण गरी १,२०० भन्दा बढीको ज्यान लिएको थियो भने २५१ जनालाई बन्धक बनाएर गाजातर्फ लगेको थियो।
यस युद्धविरामले हमासको बन्धक बनेका नेपाली विद्यार्थी विपिन जोशीको रिहाइको बाटो पनि खोलेको छ। हमासद्वारा सञ्चालित स्वास्थ्य मन्त्रालयका अनुसार, इजरायली आक्रमणबाट गाजामा हालसम्म ४६,००० भन्दा बढी प्यालेस्टाइनीहरूको मृत्यु भएको छ।