सञ्चार तथा सूचना प्रविधिमन्त्री रेखा शर्माले संघीय लोकतान्त्रिक गणतन्त्रको सुदृढीकरणका लागि एक ठाउँमा उभिन सबैलाई आग्रह गर्नुभएको छ । 

मध्यपश्चिमाञ्चल साहित्य परिषद्ले शनिवार काठमाडौंमा आयोजना गरेको एक कार्यक्रममा बोल्दै उहाँले व्यवस्थाको सुदृढीकरण र यहाँ भित्र देखिएका विकृति, विसंगतिको अन्त्यका लागि पनि फेरि एकतावद्ध भएर अगाडि बढ्नुपर्ने बेला आएको बताउनुभएको हो । मन्त्री शर्माले समाजवाद स्थापना गर्ने ध्ययलाई पूरा हुनेगरी साहित्य लेखनमा जुट्न पनि स्रष्टाहरुको ध्यानाकर्षण गराउनु भयो । सबै क्षेत्रमा निष्ठा खडेरी परेर गइरहेकाले त्यसलाई जोगाउनका लागि कला र साहित्य क्षेत्रले जोड दिनुपर्ने मन्त्री शर्माको भनाई थियो । उहाँले निरंकुशताको अन्त्यका लागि लडेकाहरुले मुलुकमा विद्यमान सबै खालको विभेद अन्त्य गराउने काममा पनि लाग्नुपर्ने आवश्यक्ता औंल्याउनु भयो । 

मन्त्री शर्माले भन्नुभयो, ‘हाम्रो आउने नयाँ पुस्तालाई निराश बन्दैछन् । हामी देखिरहेका छौं–दिनहुँ एयरपोर्टमा मान्छेका लाइन लागेका छन् । देशभित्र रोजगारीको अवस्था बन्ने देखिराखेको छैन । त्यो चेतनालाई हामीले हाम्रै देश बनाउनु पर्छ, भन्ने खालको भावना, चेतना र जागरण दिने हाम्रो पनि कर्तव्य हो कि भन्ने मलाई लाग्छ । यसमा मैले थोरै ध्यानाकर्षण गराउन खोजे । यसको मूल सहजीकरण त राजनीतिक दल, नेताहरु र सरकारले नै गर्नुपर्छ । त्यो पनि हामीले बुझेको कुरा हो । तर सँगसँगै जसरी हामी हिजो यो व्यवस्थाका लागि, यो व्यवस्था स्थापनाका निम्ति निरंकुशताका अन्त्यका निम्ति जसरी हामी सबै काँधमा काँध, साथमा साथ मिलाएर अगाडि बढ्यौं । र अहिले यो व्यवस्थाको सुदृढीकरणका लागि, यहाँ भित्र देखिने सीमा समस्या अन्त्यका लागि, यहाँ भित्र देखिएको विकृति, विसंगतिको अन्त्यका लागि पनि फेरि हामी अगाडि बढनुपर्ने, फेरि एकाकार हुनुपर्ने र हामी सबै जसले एउटा निष्ठापूर्वक सोच्छौं जीवन, जगत र व्यवहारलाई । हामी सबै एकठाउँमा आउनुपर्ने हो कि भन्ने मलाई लाग्छ ।’

मन्त्री शर्माले विदेश पलायन भइरहेका युवाहरुलाई देशमै केही गर्न सकिन्छ भन्ने भावना जागृत गराउने काममा पनि साहित्यकारहरुको भुमिका महत्वपूर्ण हुने बताउनु भयो । 

सूचना प्रविधिमन्त्री रेखा शर्मा

प्रकाशित मिति: आइतवार, पुस १, २०८०, ९:१६ बिहान

लेखक: समाचारपाटी